DALMATINSKA KUŽINA: Dalmatinska kalja

Osnovni uvjeti: 

suho meso (kost pršuta), voda
kupus, glavatni kupus, vrzet
prokulice, kumpir, mrkva, kapula
maslinovo uje, pasata ol pomidorih
pančeta, luk, sol, papar

Ka sa pašticadon i brujeton, puno je načinih kako se kuha i dalmatinska kalja. Kogod večer prin potopi kost ol pršuta u vodu, s bokun mesa po sebi, kogod potopi suha lebra, civanicu, oglavinu oli ča drugo ol bahića, a kogod stavi močit kaštradinu.

Inšoma, suho se meso more kigod minut prokuhat u uzavrenon vodi (da na šporkica gre ća), pa se ondac ta voda prolije i navisi meso kuhat u novu vodu, skupa sa kupuson ilitiga rašćikon, kapulon i kojongod mrkvon. Ako se želi gusta kalja s raspadnuton spizon, ondac ćemo kuhat puno vrimena – stavmo: dvi ure! – a ako se želi pol zubon ćutit pinku kupuse i no sve drugo, ondac ćemo kuhat manje. 

Dunkve, kal su se meso, kapula i mrkva kuhali jednu uru vrimena, meso moremo izvadit vanka, ofrankat ol kosti, a u teću ćemo ondac dodat vrzet, glavatni kupus, prokulice i kumpire; sve rasičeno na četiri dila (prokulice, ma nu, u komadu). I neka to sadar kuha jošćec malo manje ol po ure, dokle se sve ne iskuha. 

Prin vengo ča je gotovo, na masalinoven uju šufigat ćemo usitno iskrižani luk i pančetu, pa oblit su žmulon pasate ol pomidora i dolit u bronzin oli lopižu di se kuha kalja. Posolit ćemo, već naprama ten koliko je slano suho meso, bokun popaprit i jist lipo su žlicon. A meso sa perunon.