Dalmatinski portal koristi 'kolačiće' za što trebamo Vašu privolu. Ako nam želite pomoći u prikupljanju podataka za analitičke odnosno statističke svrhe, molimo Vas prihvaćanje 'kolačića' za analitiku. Naša web stranica koristi i marketinške 'kolačiće' zbog pružanja marketinškog sadržaja za koje od Vas također trebamo privolu. Bit ćemo sretni ako se slažete s tim jer Vam tako možemo ponuditi najbolje korisničko iskustvo.

Saznaj više
DALMATINSKA KUŽINA: Dalmatinska njokada
Dalmatinska kužina Piše: Siniša Vuković

DALMATINSKA KUŽINA: Dalmatinska njokada

'Maestrochef' Siniša Vuković piše o tradicionalnoj dalmatinskoj spizi

Uglavnon se va spiza čini ol govedine, ol stegna, a more se isto učinit i od istega šita ol junjetine. Jošćec se vo može zvat i – falsa pašticada!

Inšoma, navečer ćemo napodan teće iskrižat na polumisece jednu kapulu, a mrkvu vaja narizat na kolobare. Na to triba naslonit meso, grudu mesa, tako da se ne dira lna ol teće, pa da marinada more okupat i dojni dil mesa. Ovako će meso, ko škoj, bit polpuno okruženo tekućinon, s ton razlikon ča će ko Atlantida, to meso, bit polpuno potopjeno pod marinadon. A marinadu će činit pinku kvasine, pinku višje crnega vina i jošćec puno višje vode iz gustirne. Dodat ćemo i desetak zrn crnega papra, feticu-dvi korena ol selena i korena ol petrusimula, kigod list javora i kugod grančicu suhe kaduje. I, neka tako prinoći u frižideru.

Sutra ćemo, izjutra, meso obrnut u marinadi, a pri samega momenta parićavanja izvadit ćemo ga vanka, ošušit krpon i izrizat na koskice. Bacit ćemo ća grančice kaduje, javora i papar u zrnu. 

A ondac? Ondac ćemo u širokon teći na maslinoven uju i masti na naglo popeć meso sa sve četiri bande, pa ćemo ga izvadit na pijat, a na ton iston masnoći šufigat ćemo sadar kapulu, mrkvu, selen i petrusimul iz marinade. E, moremo dodat, naprama potribi, jošćec jednu mrkvu i kapulu. Pri kraju ćemo uvalit i koskice ol pančete. Pa ćemo dolit malo vode iz marinade, na zlici konšerve, na vrhu noža nožamušćade i tri-četiri klinčića. Posut ćemo i papron, pa posolit, pazeć da ne pritiramo sa soljon jerbo je pančeta jurve unutra. Položit ćemo i meso sadar u teću, ko hostiju u tabernakul.

Ovi se šug vada kuha jednu uru i tri kvarta od ure ako smo duperali meso ol junjetine, a ako je posridi govedina, ondac će nan poć dobre dvi ure u kuhanju. Kako nan šug bude pitat, oblivat ćemo ga sa marinadon, a moremo dolit i jošćec bokun prošeka, oli domaćega crnega vina. Kako ko voli, u šugu se niko vrime moredu kuhat i na dva lista ol javora, koja ćedu se butat ća prin vengo ča se ugasi oganj. 

Ka ča sama rič govori, ovin šugon ćedu se polit njoci koje smo sami umisili i skuhali. Prama šekondiman guštiman, začinjene njoke more se pinkicu posut i sa usitno iskrižanon friškon murtilon.

Vaša reakcija na temu