DALMATINSKA KUŽINA: Gril-škanpe na pulentu sa gradel
'Maestrochef' Siniša Vuković piše o tradicionalnoj dalmatinskoj spizi
Buzaru ove oli one vrste, vavik činin od onih malih škanpićih. Ukus mi je nikako guštožiji, a i ne vele škanpe nikako mi je grihota jist drugačije vengo jih ispeć na gradelan: u komadu, oli pririzane po dužini, ako su baš veliki.
E, ma za vu ricetu jema se učinit nikoliko korakov. Ovo je baš za guštat, pa ondac vada čejade i bude unaprid parićano na pacijencu.
Prvo, u kakovon teći oli bronzinu iskuhat ćemo u slanon vodi pulentu, ulijuć u nje suzu maslinovega uja. Tu ćemo pulentu prolit u lašćeru, da kal se inkorda bude jednu centimetar debjine, brž centimetar ipo. Pokle je ostinula iskidat ćemo je na koske polak pergnja širine, oli bokun veće.
Drugo, na gradelan vaja malo popeć škanpe, da nin oklopi na mistiman požmaridu, pocrnidu. Pokle je pasalo minut ipo-dva, već naprama ten koko je jaka žerava, škanpe ćemo maknut sa gradel. Nikoliko njih ćemo popeć do kraja, malo dužje, pa ćemo jih omar izist, a rašušene oklope izmrvit ćemo u maženinu za papar, da dobijemo prezlu od oklopih. Na ton iston žeravi ispeć ćemo i koske ol pulente, tako da ostanedu po njiman ne lipe špaline ol gradel.
Treće, buzaru ol škanpih skuhat ćemo kako spada: na maslinoven uju šufigat ćemo kapulu na koskice, posolit ćemo je, a ondac ćemo non dodat luk i petrusimul. Do minuta ćemo to sve zalit bilin vinon, pa dodat mravinca i izmrvjeni peperončino. Sadar vaja to zalit i sa pasaton ol pomidorih, prohmutat dobro sa drvenjačon, pa iskrenut u to škanpe ča smo jih popekli na gradelan. Posut ćemo po ten i prezlu od oklopih ča smo jih izmrvili, i zalit su jošćec bilega vina koko pita. Neka uzavre, a ondac ćemo kalat oganj napolak i molat da se iskuha do kraja, nako, obilatih kvarat od ure.
Pa ćemo so ton buzaron, ča cila daje po grilu, oblit one koske ol pulente, ča su isto tako bile ispečene na gradelan.
