DALMATINSKA KUŽINA: Kaštradina sa kupuson na tabak

U bronzinu oli u teći navisit ćemo vodu, pa kad uzavre unutra ćemo uvalit komad kaštradine. Neka kuha jednu sedan-osan minutih, već naprama ten koliki je komad (jesu lebra oli je stegno u komadu). Pa ćemo ondac prolit tu vodu ća, ter ćemo ulit novu i pustit da uzavre skupa s meson. Pokle je uzavrilo, smanjit ćemo oganj i molat jednu uru, uru i kvarat da kuha nalagahno. Posli nikih po ure vrimena, uvalit ćemo kraj mesa dva vela očišćena kumpira u komadu.

A kal je meso gotovo izvadit ćemo ga vanka, ako je lipo kuhano, ako se meso oldvaja ol kosti, pa ćemo u tu vodu uvalit iskrižani kupus ilitiga rašćiku. E, kupus ćemo opremit tako ča ćemo mu bacit nu korenastu sridu, a uzest ćemo na dva zelena jidra od lista, livo i desno. Pa ćemo, tako, posložit nikoliko listov jedan priko drugega, zamotat jih ko španjulet i popriko narizat nožon na po centimetra široke trake, ko tabak. Dodat ćemo i kigod šćapić iskrižane pančete: neka i ona da gušt! I neka to sve tako kuha dobrih uru, uru ipo vrimena, već naprama ten koliko je star kupus, je ga bi led ugriza, i dokle se ne raspade kumpir. More se dodat i pinkicu soli, ma vaja bit atento so tin, jerbo je kaštradina jurve slana.

Kal je kupus iskuhan, ondac ćemo ga šupijačon izvadit vanka u kakovu široku terinu, vodeć računa obo ten da ostane bokun vode u kon se je kuha. A pogotovo je važno, kal se izlije višak vode, prolit po kupusu ni fundać ol kumpira ča je osta napodan lna ol teće. Pa ćemo sve to lipo oblit maslinovin ujen: neka je uja obilanca!