DALMATINSKA KUŽINA: Podušene lignje

DALMATINSKA KUŽINA: Podušene lignje

'Maestrochef' Siniša Vuković piše o tradicionalnoj dalmatinskoj spizi

Osnovni uvjeti: 
lignje, kapula, kumpir
luk, petrusimul, mravinac
maslinovo uje, bilo vino, javor
juha ol ribe oli rakov, papar, sol

Najprvo vaja lignje dobro očistit ol svega nega ča je unutra, navlaš ondac ako su u pijatu lignje ol koče. Bacit ćemo ća i ni najilon ča glumi kost, a nožon ćemo treso posić priko glave, tako da oči idedu ća, a kraci ostanedu u komadu ko venac. Tubete od liganj narizat ćemo na prstene, koda ćemo jih poć frigat u brašnu.

Maslinovo uje ćemo razlit po podanku kakove teće oli pršure, pa ćemo na njemu šufigat kapulu izrizanu na kolobare. Je kapula svehla, iskrenut ćemo po njon i narizane lignje. Neka se dinsta dokle meso ne pobili skroz i pinku ne omekša, a ondac ćemo posut soljon i papron, pa mravincon i zalit bilin vinon. Neka tako to sve skupa još kuha desetak minutih.

Pokle je pasalo toko vrimena, a dil vina je ižvampi, složit ćemo kumpire narizane popriko na kolobare. I podušit lignje š njiman. Zasut ćemo sve to skupa s iskrižanin lukon i petusimulon, a more se dodat i list oli dva javora. Sadar ćemo ulit u to jošćec u žmulu bilega vina i juhe ol ribe oli kakovega raka (ol glav kongih), taman toliko da sve oplivi. Teću oli pršuru vaja dobro poklopit i molat da kuha ne na puno žeštoko, ma ne ni na lagahno. Nako. S vrimena na vrime, digod, vaja protrguzat tećon da se unutra to malo boje prožme, a kal je pasalo obilatih po ure spiza je gotova. Neka kigod minut oldahne pokle smo ugasili oganj, i moge se jist.

Vaša reakcija na temu
Pregledaj komentare