DALMATINSKA KUŽINA: Rižot ol kozic
Dalmatinska kužina Piše: Siniša Vuković

DALMATINSKA KUŽINA: Rižot ol kozic

'Maestrochef' Siniša Vuković piše o tradicionalnoj dalmatinskoj spizi

Kozican ilitiga kongan vaja očistit repiće, a to će se dogodit tako ča ćemo nin oldilit glave i oklope ol mesa. Sve to ča maknemo sa repićih metnut ćemo u jednu teću, stavit ćemo dva-tri češja luka u komadu, jednu na četiri dila narizanu kapulu, dvi-tri grančice petrusimula i kogod zrno crnega papra. Posolit ćemo to malo.

Ondac ćemo na maslinoven uju šufigat jednu usitno iskrižanu kapulu, pa kad dojde njezina muka kraju, bokun ćemo je posolit i prosut po njon iskrižanega luka. Kad je luk zavonja po cilon kužini, okrenut ćemo ga dva-tri puta drvenjačon, ter ćemo na sve to skupa iskrenut očišćene repe ol kongih. Neka se šufigaje nalagahno, kigod minut. Kad se sve rašuši ulit ćemo u žmulu vina.

Pokle je vino ižvampilo dolit ćemo jošćec vina i juhe ol kongih. Neka to tako tihula kvarat od ure, a ondac ćemo u to usut rizi. Pa pojačat oganj i, kako bude pitalo, dolivat ćemo juhu od kongih, da nan rizi ne prisušidu. Dolivat ćemo tu juhu doklegod se rizi ne iskuhadu al dente. Kad je sve gotovo umišat ćemo u to depju iskrižanega petrusimula i kosku masla, pa izvadit na pijat.

Vaša reakcija na temu
Pregledaj komentare