DALMATINSKA KUŽINA: Viški pojorski bronzinić

Osnovni uvjeti: 

šučivica, orzo, voda, kapula
luk, petrusimul, sol
maslinovo uje, javor, papar
pasata ol pomidora, bilo vino, prošek
slalka mlivena paprika, peperončino, lignje, sipe

U našon lipon Dalmaciji, kako znamo, jema puno vrstih spize, a puno njih je, opet, kolikogod neobišnih, toliko i čudnih i ukusnih, tobože guštožih. Ka ča je paštafažol na brujet ništo polpuno naročito, isto je tako i viški pojorski bronzinić, ustvari, jedna puno interesantna riceta, za koju trefit vajalo bi priplovit po Mediterana, a brž i višje… 

Govoru, tako, sićanja i teštimonijance da je ribar sa Visa hodi za ribon i doša lipo tamo do Atlantika, do Portugala, pa da je na ten putu vidi kako se grahorice mišadu sa brujetadan ča se činidu ol ribe. Pa je sa jedne bande nasta ni poznati paštafažol na brujet, ča smo ga jurve malopri imencovali, a, bome, porodilo se i jedno drugo jiće, vo ča ćemo ga sadar parićat, a zove se: viški pojorski bronzinić. Stari judi su govorili kako su užali unaprid iskuhat spizu za odnit je u poje u bronziniću, di se ašištidu ložja i maslinade, pa da se tamo manje dangubi doklen se lavura… E, tako je nastalo i vo tradicijonalno jiće sa škoja Visa, ča ćemo ga sadar poć iskuhat.

Najprvo ćemo u dvi teće, oli bronzinića, navisit vodu, neposoljenu, pa ćemo ondac, pokle vode uzavredu, u jednu metnut kuhat šučivicu, a u drugu ćemo složit orzo. Recmo, pritpostavka, da će nan tribat po kvarat i šučivice i orza. U svaku ćemo teću, oli bronzinić, iskrenut po polak iskrižane kapule, po dva češja luka i bokun iskrižanega petrusimula. I molat ćemo da to kuha na sridnje jaken ognju, u puno vode, doklen se deboto ne iskuha. To će reć jednu tri kvarta od ure (za orzo jošćec bokun boje). 

Doklen to tihula, u drugen ćemo sudu na maslinoven uju šufigat na škaje iskrižanu kapulu, kojon ćemo prama kraju dodat usitno iskrižan luk i petrusimul. Je to sve bokun svehlo, iskrenut ćemo unutra na koskice iskrižane sipe i na šajbe narizane lignje. Ka ča je namo bilo po kvarat šučivice i orza, ovode neka bude po kvarat sip i liganj, oli pinkicu boje. Boje da prihitadu, po pizu, lignje i sipe, vengo da težji budedu šučivica i orzo. Pokle je pasalo pe-šest minutih šufigavanja liganj i sip, oblit ćemo jih bilin vinon i dodat u njih dva-tri lista javora. Neka tako daje kuha nalagahno, dokle se glavonošci deboto ne iskuhadu. 

Ondac ćemo jih jopeta dobro zalit vinon, posolit i popaprit, pa dodat u to pasate ol pomidorih i na zlici slalke mlivene paprike (ko voli bokun žešće, uvalit će i jedan-dva peperončina). Iskrenut ćemo sadar to sve skupa da se kuha u bronziniću, zajedno sa prociđenon šučivicon i orzon, a dolit ćemo u to i ne juhe u kon se je kuhala šučivica. Prin samega kraja lipo bi bilo ulit i u žmulu prošeka, pa neka tako tihula ispotiha jošćec kolo kvarat od ure, dokle se sve lipo ne prožme.