Brujet ol muzgavcih i lignjunih
Dalmatinska kužina Piše: Siniša Vuković

Brujet ol muzgavcih i lignjunih

'Maestrochef' Siniša Vuković piše o tradicionalnoj dalmatinskoj spizi

Osnovni uvjeti:
muzgavci, lignjuni
maslinovo uje, kapula
luk, petrusimul, prošek
ruzmarin, kaduja
javor, sol, papar
pasata ol pomidorih
peperončino, kvasina
bilo vino, crno vino 

Recmo da je muzgavac falša hubotnica, a da je lignjun falša lignja! Grubo to zvuči, ma je zato slasno kal se parića u teći oli u kotlenki. Muzgavac se ol hubotnice, oli hubotuna, razlikuje po ten ča je puno manji, svitliji, i ča izgleda nikako glupje! Lignjun je ol lignje blidiji, a nema ni ona krilca duž tila ka lignja, vengo samo kopjasti rep na kraju. Eto. Savladali smo prvi lekcijun. 

E sad, kal smo sve to, kako bi moja pokojna nona rekla: 'terminološki riješili', ondac moremo pristupit parićavanju vega brujeta.

Na vrilen maslinoven uju šufigat ćemo kapulu iskidanu na polumisece, a na po šufigavanja posut ćemo kapulu su finon soli, kako bi se bržje finila. Sekund pri vengo ča je kapula gotova, dodat ćemo u nje usitno iskrižani luk i petrusimul, pa kal luk zavonja, jen-dva-tri, iskrenut ćemo iskrižane muzgavce i lignjune. Ondac ćemo jih dinstat jednu desetak minutih, a kal se počmedu lipit za lno ol teće oblit ćemo jih sa žmulon bilega vina. E sad, kal vino ižvampije, ondac ćemo sve to zalit su bilin i crnin vinon, ter prošekon. Bacit ćemo po ten suhih listov ol ruzmarina, kaduje i javora, metnut jedan oli dva peperončina; ulit ćemo pasate ol pomidorih, u bićerinu kvasine i na kućarinu papra.

Molat ćemo vo sve da nalagahno tihula uru vrimena, dokle meso ne smekša.

P.S. Jema san čut da je boje ako led bokun ubije ve glavonošce. Barenko jedan dan u jaceri, da se smrzne skroz naskroz. Drugo ča san jema čut je da se u muzgavce ulije u bićerinu rakije dokle se kuhadu, jerbo rakija čini dobro njihoven kuhanju. Eto man ga, pa vi činte kako znate.

P.S.S. Sve vo ča san reka u von štoriji obo muzgavciman i lignjuniman, moga san reć i u jednon drugon obo hubotnici, lignjan i sipi. Pa ćemo tako dobit jedno bokun ukusnije i boje jelo, ako pojdemo za tin da su hubotnica, lignja i sipa ipak kvalitetnije namirnice.

Vaša reakcija na temu
Aloooo article_emotions(51233, "");
Pregledaj komentare