DALMATINSKA KUŽINA: Frementunica - kruh ol kukuruza

Osnovni uvjeti: 

brašno ol kukuruza
brašno ol šenice, kvas, sol
maslinovo uje, voda 

Frementunica je štruca kruha ča se peče ol kukuruznega brašna, ol mlivenega fara iliti farinele. Dunkve, to nĩ ni greza ajnzerica, ni grezija cvajzerica, a ni grif, vengo je to 'muka' ča se dobije kal se kukuruz istrvi pol žrnon na mlinu. Kako je to kukuruzno brašno grezo, na po puta do pulente, e, to je teško ol njega umisit pravo tisto. Zato ćemo u to brašno dodat bokun glalkega brašna ol šenice, stavmo, pritpostavka, dvi dobre šake glalkega na po kila nega ol kukuruza.

Pa pokle smo u terini izburtili obedvi vrste brašna, iskrenut ćemo sve to skupa na stol, formirat ol tega brig, a na vrhu njega učinit ćemo jednu jamku. U nje ćemo ulit kolo po deca maslinovega uja, pa ondac i, nako, tri deca vode u kon smo raskravili naprstak soli i kosku kvasa. Ol svega tega umisit ćemo tisto, dobro ga pobijajuć dlanoviman. I, molat ćemo ga da se na teplen mistu, pokriveno krpon, diže. Je pasalo uru vrimena, tisto ćemo jopeta pripomisit, pa ćemo ondac umisit turtu i leć je da i daje kisne. Kal se je još malo digla, uvalit ćemo je u peć da se peče na kolo 180 stupnjev temperamenta, nako, dobru uru vrimena.