DALMATINSKA KUŽINA: Artičoki sa bižon, kongan i škanpan
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
artičoki, biž, konge, škanpe
maslinovo uje, juha ol kongih, voda
kapula, sol, papar, prezla, luk, petrusimul
Ovu manjativu mogli bismo nazvat 'bodulski artičoki', za razliku ol 'vlaških' sa pršuton.
Najprvo ćemo očistit dobru šaku kongih, pa ćemo glave i oklope metnut u kakovu teću, a repe ćemo uvalit u blender. Pa ćemo ondac u teću s glavan iskrižat kapulu, kigod češaj luka, grančice petrusimula, soli i papra, ter ćemo nalit vode i ol tega iskuhat juhu. Dokle juha kuha, u blender sa očišćenin kongan dodat ćemo sedan-osan češjih luka, šaku petrusimula, dobru zlicu prezle, po žmula maslinovega uja, soli i papra, pa ćemo to sve skupa dobro ispaštroćat. So ton smjeson ćemo napunit lebra od operenih artičokih (duzine artičokih).
Napodan kakove vele teće iskrenut ćemo biža, toko da bude priko polovice artičokih ča ćemo jih složit impijo jedan uza drugi. Posolit ćemo i popaprit. Sadar ćemo ulit maslinovega uja, nako, pa zalit sa juhon ol kongih da sve oplivi. Kal uzavre smanjit ćemo oganj napolak i kuhat dobrih po ure. Digod ćemo protrguzat tećon, a ondac ćemo dodat u šaki škanpih, da i ne dadu gušta, pa kuhat daje jošćec jednu kvarat od ure.
