DALMATINSKA KUŽINA: Brujetin ol giric i suhav

Kako to već gre, na maslinoven uju šufigat ćemo na polumisece narizanu kapulu, kojon ćemo prin kraja dodat na trakice iskrižani luk i usitno iskidano lišće ol petrusimula (kasnije se more dodat i jošćec pinkicu živega petrusimula u kuhanju). Prama kraju ćemo šufig posolit. Pa ondac vada iskrenemo u to narizane pomidore obarene i očišćene ol kore, u šaki suhav iliti grožđica, na kućarinu cukra, dva izmrvjena peperončina i sve zalijemo su dva žmula bilega vina i žmulon prošeka. Neka kuha desetak minutih, dokle se sve skupa ne prožme, a ondac ćemo u to ulit u bićerinu kvasine i složit girice.

Girice smo očistili od lustar, okinuli smo nin repe i glave, i izvadili drobe. Pokle smo metnuli ribu, ako ni brujet dosta vodan, ondac ćemo dolit jošćec kugod kap prošeka i bilega vina. Neka daje kuha nikih desetak minutih, dokle se girice ne počmedu raspadat. Kadikad teću vaja pinku protrguzat, da ne zagori, a kad se iskuha riba ondac se more brujeton oblit manistra oli pulenta.