DALMATINSKA KUŽINA: Cviti 'jelšonski'

Fotogalerija (12)

Osnovni uvjeti: 
4 jaja, 30 dek cukra, 15 dek masti
vanilija, meštro, amonijak, brašno
maslinovo uje, nožamušćada, mliko
kora od limuna i naranče

Cviti su slalke galetine, lipi keksi, ča se najpri vežijedu sa škojon Foron i škojon Vison. Normalno, i po njiman od mista do mista postojidu diference, ka ča postojidu cviti i na drugiman škojiman, ko u mene na Braču, navlaš u Bolu. Ma, forski i viški su - ne triba se niko jidit - najpoznatiji meju sviman.

E, u počelu ćemo u kakovu terinu iskrenut 15 dek masti ol bahića, 30 dek cukra, jednu vaniliju i obilatu velu, starinsku zlicu za juhu maslinovega uja, pa ćemo to dobro istuć mikseron. Do malo vrimena, pokle smo to žbatili, dodat ćemo četiri žumanca ol jaj (bilanca gredu u drugu terinu, zbande), dobar bićerin meštra (oli kakovega drugega likera, stavmo pritpostavka gorčice). Pa nastavit žbativat mikseron doklegod nan ne dojde ča je moguće rilkija smjesa. Je to gotovo, izgratat ćemo unutra barenko po jednu koru ol naranče i jednega limuna, a ko voli da se boje čujedu, dodat će jošćec bokun i limuna i naranče. Sal ćemo to daje mišat drvenjačon, da nan na lopatican ol miksera ne ostanedu izgratane mrvice od agrumih.

E, sadar vaja ona bilanca u drugon terini dobro istuć doklegod ne dojdedu u tvrdu pinu, tako da terinu moreš obrnut naopako, a da snig ol bilanca - kega je jurve obilanca - ne ispade iznutra. Gotovo. Neka terina miruje minut, taman doklen se u teći na špaheru stepli 10 zlic, velih zlic ol juhe mlika. Kal je mliko da će uzavrit, a to je odma, iskrenut ćemo u nje pomalo prah od amonijaka i obrnut glavu na drugu bandu, jerbo bi od smrada moga past na malu guzu! To vele paha, bome po pišoti, ali, jebiga, tako to gre da bi bilo autentišno. Amonijak je vode zanamisto kvasa, zanamisto praška za pecivo, da učini tisto poslin malo koda izdašnije. Za vi amonijak teća vada bude bokun veća, jerbo kal se on počme širit vada jema mista.

Sada sve skupa jemamo tri suda. Pa ćemo u nega prvega sa žuton smjeson, di smo istukli mast, cukar i mirodije, iskrenut šaku-dvi brašna, pa ondac pomalo dodavat dvi-tri zlice bilanca, dvi-tri zlice amonijaka, ter to sve skupa dobro izburtit drvenjačon. Čin se je to dobro zamejalo, ponovit ćemo jopeta sve isto, i ponovit, i ponovit doklegod ne potrošimo vas amonijak i svo bilance. Daje ćemo nastavit dodavat brašna i mišat drvenjačon doklen se more, a ondac tisto vaja iskrenut na pobrašnjeni stol i nastavit ga daje misit rukan dodavajuć brašno. Brašna gre, po običaju: koko pita. Vaja ocinit momenat, ka vavik sa tistiman, ma računajte da će poć jednu kilo ipo brašna. I, umiseno tisto, neka počine barenko po ure.

Ondac ćemo okinut komad, pa ga izlazanjat ča je moguće višje u kvadratastu formu, tako da pari ko kuhinjska krpa, samo ča vada bude malo manje ol po centimetra debeline. Rotulon ćemo sadar popriko isić izlazanjano tisto na široke trake (koliko hoćemo da nan posli budedu visoki cviti), pa ćemo ondac okomito, iskosa, te trake rizat u trokute. Svaki trokut na širjen dilu zasić ćemo na dva mista dopolak, tako da nan posli jemadu tri roga odizdali, a špic ćemo mu zavrnut ustranu, tako da ga bude lišje za vidit. Ako je trokutić ispa manji, zarizat ćemo ga jurve na jednen mistu. (Vaja reć i to da su stare žene činile vele cvite, ča su samo dva stala u lašćeru. A bili su i drugačiji: izlazanjano tisto u obliku elise sa gornje i dojne bande se zarizalo na četiri mista, ondac su se vrsi zavrćali i zaoštravali koda u rožiće, pa su parili ko engleska oli makedonska bandira. I to su žene činile rukan mečuć i tanjajuć tisto omar u lašćeri.)

Cvite ćemo slagat u namašćanu lašćeru ča smo je langvido posuli brašnon, pa ćemo jih uvalit u peć i peć na 220 gradih temperamenta, već naprama ten kako grije špaher. Pečedu se dokle ne dobijedu nu lipu boju koda hrastovine, a to će reć olprilike desetak minutih. Kal smo ispekli sve cvite, pa kal su oni ostinuli, ondac ćemo u malu terinicu ulit dva bićerina meštra i razvodnit liker vodon. Pinelićen ćemo pomazat svaki cvit ton bevandon ol meštra i umejat ćemo ga u cukar da dobije lipi ornamenat, da dobije koda krunu, kako kraj oli krajica.