DALMATINSKA KUŽINA: Dagnje pohovane u pulenti
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
dagnje, sol, pulenta
suncokretovo uje, jaja
Lipe velike dagnje iskrenut ćemo u kakovu teću, metnut na oganj, pa jih pustit da one pustidu more: da se otvoridu na pari. Je pasalo jednu pe-šest minutih, tu kakovu teću skalat ćemo sa ognja, izlit more ča su ga škojke ispišale, i molat da se sve ohladi.
Ondac ćemo, jedno po jedno, vadit srce iz dagnjih: ali tako da ćemo škojku zaklopit u livon ruci, pa s onon desnon izgulit ne brke. Sva srca metnut ćemo u kakov pijat. A u drugi duboki pijat istuć ćemo jaja s pinkicu soli u sebi, pa ćemo u to jaje usupat srca ol dagnjih. Nasupana srca sadar ćemo pripomistit u treći pijat sa pulenton, di ćemo jih dobro izmejat i prišaltat u četvrti pijat.
E sad, u pršuri ćemo navisit suncekrotovo uje, pa kad se užešći u nje ćemo iskrićat u pulentu umejana srca ol dagnjih. Neka se lipo frigadu minut dva na žeštoko, a ondac ćemo jih obrnut na drugu bandu. Pokle su se zahrustulala, srca ćemo izvadit na peti pijat sa faculeton ol karte na sebi, da faculet ušeka u se višak uja iz friganje.
