DALMATINSKA KUŽINA: Galetine
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
4 jaja, 20 dek cukra, 25 dek masti
vanilija, sol, rum, šoda bikarbona
brašno, prašak za pecivo
Em jih je lipo jist, em vonja cila kuća kal se pečedu, em moredu durat cilu šetemanu… Galetine…! Ilitiga keksi.
Najprvo, kako spada, u terinu ćemo razbit četiri jaja, na koja ćemo prosut dvadesetak dek cukra, vaniliju, pinkicu soli i kvarat raskravjene i ostinute masti. Mikseron ćemo to dobro žbatit, istuć da se učini lipa žuta žitka smjesa. Pa ćemo ondac u pijat iskrenut dvi šake brašna, dva praška za pecivo i naprstak šode bikarbone. Jesmo to lipo izburtili, pomalo ćemo iskrićat u terinu sa žbativenin jajimam, stalno mišajuć drvenjačon. Brašno ćemo nastavit dodavat malo po malo, sve doklen ne ocinimo da je tisto popilo dosta. Tisto ne smi pišćit, nevaja da bude pišćavo: da se ispiša i da bude vodno! Grudu ćemo sadar iz teće izvalit na stol, pa umisit u tvrdikavo tisto. Pokle smo ocinili da je tisto gotovo, fermat ćemo i misit i dodavat brašno, pa ćemo ga vratit nase u nu istu terinu, pokrit krpon i molat da olpočine kugod uru. (Stare su žene vavik govorile da je najboje tisto umisit izjutra, a ondac popodne peć galetine; oli, zamisit sve svečera, pa ujutro navrime š njiman u lašćeru i u peć.)
Kal je tisto oldahlo po dana, priko noći, oli kugod uru, na kraj stola montirat ćemo nu makinu ol giza, prosut u nje pinkicu brašna i tista, pa zavrnut da tisto projde do kraja. Brašno se vada metne da se tisto ne lipi dokle se bude nadivalo. Na vrhu makine zavidat ćemo štampu, nu latu sa urizanin profiliman, navinjat ćemo nu bužu kakove hoćemo da nan budedu galetine, uvalit ćemo u šaki tista i zavrtejat ćemo manicon, stalno prstiman nabivajuć tisto da se lašnje gura prama štampi.
Guja ol tista izlist će iz žval ol makine, dočekat ćemo je dlanon, a kal dojde dugaška na jednu desetak centimetar, okinut ćemo je tako da ćemo potegnut rukon prama gori. I svaku slideću galetinu stivat ćemo sebice u lašćeru. Ne triba je ništa mazat mašćon, jerbo je tisto jur dobro namašćano.
Jesmo naredali sve galetine u, pritpostavka, tri stive u lašćeri, uvalit ćemo je u raškaldanu pećicu ol špahera, pa ćemo jih daje peć na jednu 180 stupnjev temperamenta, dokle ne dobijedu nu lipu boju keksih, nu lipu boju suhe česmine, nu lipu boju meda.
