DALMATINSKA KUŽINA: Grancigula zapečena

Navisit ćemo vodu, posolit ćemo je, pa kad uzavre u nje ćemo metnut grancigulu da se kuha. Desetak minutih kuhat će se u jednon pozi, desetak minutih neka se kuha naopako. Izvadit ćemo grancigulu, i pustit je da ostine.

Kal se je rak ohladi, ondac ćemo mu odvalit noge ol tila, pa ćemo te noge lagahno, malin mlačićen, udrit na tajeru, ter ćemo izvadit meso iznutra. Triba pacijence za to. A kal su se očistile noge, ondac se poldigne oklop ol guzice prama gori, lipo pomalo da se ne islomi. Iza glave su govna ča jih vaja bacit ća, najboje je to učinit s malin kućarinon. Pa ono ča ostane očistit ćemo sa faculeton ol karte zamotanin kolo prsta.

Unutra su i trokutasti šćapići sive boje ča se isto tako jidu, a ispod, u prigradican iz kojih su resle noge, nać će se puno bilega mesa. To se svo meso izvadi kućarinon vanka, na pijatić kraj mesa iz nog. Pinku ćemo to posut papron i soljon, kronut ćemo i na zlici maslinovega uja, a ondac ćemo dodat usitno iskrižani luk i petrusimul, ter izgratani sir gauda. Sve skupa ćemo dobro izmišat i napunit u oklop ol grancigule ča smo ga iznutra namazali maslinovin ujen, ter ćemo priko svega ugrubo izgratat jošćec mekega sira gaude.

Tako ćemo to stavit u pećicu dvadesetak minutih da se peče, a kal se sir raskravi po vrhu i kal dobije nu lipu kafenkastu koricu, grancigula je gotova i more se jist.