DALMATINSKA KUŽINA: Gulaš ol divjega goluba

Osnovni uvjeti:

divji golub, pančeta, voda

maslinovo uje, kapula, kumpir

slalka crvena paprika, peperončino

pasata ol pomidora, javor, kaduja

crno vino, bilo vino, mravinac

papar, sol, luk, petrusimul

Zračna puška je malo, ma je zato flober dovojan da se 'skine' divjega goluba ča, obišno, tuntenja na žici ol struje u gori. Oli na grani. Jema jamar, a jema i grmoš.

Kačaduri znadu da je najboje divje golube čekat na kakoven lokanju, naročito kada je bura, kal se svi ti lokanji rašušidu, ko madiri na kajiću ken je zvizdan udri u glavu, na suhen vezu… Zna se di divji golubi doletidu, a to se reče da se zna di divji golubi - 'padadu'. Golubi su jugonostalgičari, a kačaduri su buranostalgičari: prvi volidu jugo, jerbo je onda i kiše, vode za napojit se, a vi drugi volidu kal je bura, pa moredu penjat ploke, di ćedu doć na vodu kosići, ćuške, ma i divji golubi.

Metkon potegnutega divjega goluba, oli ćapanega pričepjenega pol plokon, uronit ćemo u vrilu vodu, pustit ga tako kigod minut i - operušat! Oće se vrimena za operušat goluba, jerbo to ne vaja činit na prišu, da mu se koža i meso puno ne razbijedu. Nožon ćemo mu otvorit drob ispod prsijuh i izvadit žigericu iznutra. Pa ćemo ga rasić popoli i oprat vodon, ter ga dobro istrit krpon. I ondac vaja svaku polovicu rasić na tri dila: batak, karabatak i malo lebar, pa krilo sa komadon prsijuh i no rešto prsijuh i škine ča ostane. Divji golub piza olprilike kolo 35 - 40 dek.

Napodan teće sal ćemo zagrijat maslinovo uje, pa na njemu na naglo popržit komade isičenih golubov. Pokle smo 'ubili krv' sa svih stran, meso ćemo izvadit na jedan pijat, a na tu istu masnoću popržit ćemo na koskice iskrižanu kapulu. Pinku ćemo je pri kraju posolit, pa ćemo usut iskrižani luk i petrusimul, ka i po šake na koskice narizane pančete. 

Kal se je sve lipo zazlatilo dodat ćemo ne komade poprženo meso, sa svin nin sokon ča ga je meso pustilo. Zalit ćemo s po žmulon crnega i bilega vina, dolit dec-dva pasate ol pomidora, usut na vrh noža mlivene slalke crvene paprike, pinkicu papra, jedan izmrvjeni peperončino, dva lista javora, po jedan kućarin usitnjenega mravinca i kaduje, ter ćemo još malo polit s vodon, da sve dobro oplivi. 

Posli nikih tri kvarta od ure kuhanje, da bi to bi pravi gulaš, dodat ćemo na koske iskrižani kumpir, pa ćemo zalit s jošćec teple vode i crnega vina, bevandon dakle, i molat da se nalagahno daje kuha. Iskuhani kumpir govori nan da je gulaš ol divjega goluba gotov.

P. S.

Ova se ista riceta more učinit sa brabarican i sa grlican, s tin da ćedu se one kuhat kraće, jerbo su manje. A more i sa fazanon – ko van to more zabranit!? - s tin da će se fazan kuhat dužje, jerbo je fazan veći.