DALMATINSKA KUŽINA: Hrustule

Osnovni uvjeti:

4 jaja, 1 žlica cukra, sol, rum

sojino uje, brašno, cukar u prahu

Ol svega slalkega hrustule spadadu u no najpipavije! Vaja jemat ruku, vaja znat, vaja bit atento i – jopeta nis sigur da će sve svršit kako Bog zapovida!

Čovik ne bi to promisli, brž ne bi ni žena, ma najvažnija stvar je da jaja za hrustule ne smidu bit u frižideru, jerbo se nećedu žbatit kako spada. Ne smidu bit ni puno stara, a najboje bi bilo da su prava domaća, ol kokoš ča jidu črve. Za učinit jednu 'dožu' hrustul potribna su nan 4 jaja, koja ćemo pomnjivo razbit i odvojit bilanca ol žumancih. Napose ćemo žbatit žumanca, napose bilanca. Pa u žumanca iskrenut velu žlicu cukra, isto toko sojinega uja, u čepu ruma i meju prstiman soli. I dobro sve izburtit drvenjačon. Ondac se doda u žumance i bilance, pa se sve dobro jošćec izmiša. Nakon tega se, mišat ne pristajuć, stane dodavat glalko brašno – koko pita.

Kad zagusti, tisto se iskrene na stol, pa se nastavi daje misit, posipajuć ga brašnon. Vaja osjetit pol rukon kal je dosta brašna i misenja.

Ondac se tisto razvaja u vajak, pa se podili na četiri dila, i svaki od njih umisi u malu grudicu, ko malu sirnicu. Pa ćemo jih onda posložit na kuhinjsku krpu, zamotat u jošćec tri kuhinjske krpe, ter na kraju zamotat najilonon. Najilon je najvažniji vode, jerbo nan se tako neće stvarat kora na vrhu tista, vengo će tisto ostat ravno i meko, ko sisa. Poviše najilona dojde jošćec jedna deka. I, neka tako počije barenko dvi ure, a dobro bi bilo i tri.

Pokle je tisto olpočinulo, lipo ćemo izvadit jednu grudicu i metnut je na stol ki smo langvido posuli brašnon. Tisto se ne smi višje misit, pokle je počinulo. Vengo, lazanjuron ćemo ga jurve rastegnut na sve bande natanko, a na samen kraju ćemo pomnjivo rukan daje lagahno razvučivat tisto dokle ne dojde tanahno deboto ka kartina. E, za to vaja jemat ruku. Računaj da će ti prvih nikoliko putih tisto puknut, sto posto. Vo razvučivanje tista rukan vada svrši tako da no bude u obliku vele kvadrele, da se moredu lašnje rizat jednake trake.

A te jednake trake rizat ćemo rotulon po visini. Pa ćemo uzest u ruku jednu traku, pazeć da ne pukne i motat ćemo je prvo kolo kažiprsta, pa drugi krug kolo sridnjega prsta, pa treći kolo prstenjaka. I ondac so tin naglo u tećicu sa sojinin ujen (koje mora bit uzavreno, ali ne previše žeštoko), a u drugon ruci vada bude atento parićan veli perun, kako bismo omar mogli š njin modelirat hrustulu u uju. Jerbo, tisto je tanahno i no se omar isfriga, inkorda, pa se nema kal puno kolo tega zafrkavat. Koji sekund pokle smo formirali hrustulu u uju, obrnut ćemo je na drugu bandu, jen-dva-tri i – gotovo! Čin dobije boju, š njon vanka: pomnjivo, da ne pukne! Na kartu je vaja leć, da se ocidi uje. Pa ćemo ondac, kal smo isfrigali sve hrustule, lipo jih slagat na drugo misto i posut sa cukron u prahu.