DALMATINSKA KUŽINA: Jetra sa pulenton

Osnovni uvjeti: 

jetra ol telića, mast
kapula, sol, papar, crno vino
kvasina, maslinovo uje, pulenta, voda

U kakovon pršuri na masti šufigat ćemo kapulu iskrižanu na škaje. Pa kal se je kapula lipo zastaklila (nesmi zgorit!), na nje ćemo iskrenut jetru ol telića ča smo je isprva narizali na fete, a ondac te fete na veće koskice oli pravokutnike. I neka se to tako skupa šufigaje. Obrćat ćemo jetru da ne zagori i da se popeče sa svih stran. Pokle se je ubila krv ča je je jetra pustila, ulit ćemo u žmulu crnega vina, dobro promišat i molat nalagahno da tuntenja pokriveno. Kadikad ćemo promišat i oblit vinon, a tek na samen kraju ćemo jetru posolit i poparit, ter ulit u bićerinu kvasine. 

Pulentu smo iskuhali nastranu u posoljenon vodi i s kapjon uja u sebi, pa kal je jetra gotova ondac ćemo zlicon vadit komade studene i inkordane pulente na pijat skupa s komadiman jetre, i sve lipo poškropit šugon ol vina i konče u ken se sve to lipo kuhalo.