DALMATINSKA KUŽINA: Komarča u soli

Osnovni uvjeti:

komarča, greza sol
luk, petrusimul
maslinovo uje, papar

Vo je idealna riceta za sve ne ča ne znadu čistit ribu: je to vaja činit ol glave, oli ol repa...? Vode nima dileme. Lustre ne triba strgat, vengo je dosta da se komarči nožon raspare drob, ter da se izvadidu drob i branče. I, to je sve ča se tiče čišćenja ribe.

Pa ćemo ondac u duboken pijatu izmutit dva-tri bilanca ol jaja, već naprama ten kolika je riba. Kal su se jaja dobro zapinila, ulit ćemo isto toko vode i dobro izmišat. I u to vaja iskrenut greze soli, onoliko da se učini gusta smjesa.

Ondac ćemo u plilkon lašćeri usut centimetar debelu deku ol greze soli, pa na nju izlit polak ove smjese. Posložit ćemo na to ribu, ku smo dobro iznutra posolili i popaprili – i kon smo metnuli u drob cilu grančicu islomjenega petrusimula i popoli prisičen jedan veći češaj luka – nakon čega ćemo je zasut sa grezon soljon, tako da se sve dobro zakopa. I, s tin svin u peć. Neka se peče na 200 stupnjev jednu tri kvarta od ure.

Pokle je prošlo vrime pečanje, izvadit ćemo lašćeru iz špahera. Pustit ćemo dva-tri minuta da se spiza smiri, da oldahne, da ferma cvrčat.

Ondac ćemo s onin mlaton s kin se tučedu šniceli, baturicon, samo s onon tupon bandon, lagahno bubnut skrućenu sol, da bismo ofrankali ribu. Kako maknemo ne oble fete soli – ko madiri na barki oli duge na barilu – tako maknemo i kožu sa ribe, ča je zalipjena za ti oklop ol soli.

Ribu pribacimo na pijat, pa je oblijemo su maslinovin ujen. Uza nju moremo metnut čagod lešo povrća, na primjer, kumpir i kavul. I dobro ćemo to posut papron i jopeta zalit suzon maslinovega uja.