DALMATINSKA KUŽINA: Kotonjada

Prvo vaja reć kako bi tribalo nabavit dunje ča nisu polivane. To je dupli problem! Dupli problem zarad tega ča ondac dunje nećedu parit ko sa izložbe, ka ni pomidori ča jih iz staklenikov, oli plastenikov, donesedu prodavat… A svi su isti… I moreš jih kupit kal nin ni štajun. A drugi problem je ča ćedu iznutra bit puno izidene, i vaja jih puno čistit.

Dunje, domaće, prave, ogulit ćemo ko kumpire. Pa ćemo jih pririzat popoli, ko jabuku. Ondac ćemo nožon maknut na govna ča su unutra, plus svo no simenje ča je u sridi. Zdravo meso ol dunje iskrižat ćemo na tanke fetice i stavit u teću u kon ćemo jih kuhat.

E, pokle smo opremili dunje, nalit ćemo vode tek toliko da prikrije iskrižano voće. Ne višje. I upalit na žeštoko. Kal uzavre, smanjit ćemo oganj i molat da kuha nalagahno jednu uru vrimena.

Kal su dunje omekšale, izmirit ćemo jih, pa koliko je njih isto toko ćemo dodat i cukra. Kilo dunj, kilo cukra; dva kila dunj, dva kila cukra… Pa ćemo to tako kuhat jošćec jednu uru ipo do dvi ure vrimena, stalno mišajuć da nan se ne zalipi. Pri kraju kuhanje dolit ćemo u smjesu sok od limuna.

A kal je sve to svršilo, ondac ćemo kalup, oli kalupe, di hoćemo izlit kotonjadu, namočit vodon, pa u to izlit iskuhanu kotonjadu, ter ostavit da se stisne i ohladi. Posli jednu 24 ure vrimena kotonjadu ćemo iz kalupa iskrenut na pijat po kojen smo razasuli listove javora. Tako ćemo je pustit kigod dan da se šuši. Ako je vrime ol bure - idealno!

I, kotonjadu ćemo rizat na fete, pa ćemo je posut cukron. Vako, more durat i nikoliko misecih, navlaš ondac ako je je bura dobro oprudila, tobože rašušila.