DALMATINSKA KUŽINA: Krv od janca frigana i kuhana

Krv od janca frigana

Osnovni uvjeti:

mišćanin ki jema janca

krv ol janjca, luk

maslinovo uje, kapula

sol, papar, petrusimul 

Kal se dospilo vrime života janca u zagonu, oli u toru u gori, vajalo bi parićat 'na gotovs' tećicu od litra-dva, pa u nje metnut maslinovo uje, sol i papar. Da pokrije lno. Je, potriba nan je i ol jedne starinske drvenjače, tanahne, kako bismo š njon mogli mišat uje, sol, papar i krv ča u tećicu teče, kal se nožon jancu pririže vrat, kal ga se počme klat…

Krv, ča teče u tećicu sa ujen, soli i papron, mišamo i mišamo, pa i daje mišamo i mišamo (oli, ako nan se gadi, damo da to ko učini zanamisto nas), su drvenon zlicon, a more i s perunon i… u jelnen momentu fermamo, ter pustimo da se krv stisne. Ko puding (pardon: buding!). 

Kal se krv stisnula, ondac ćemo na pršuri, na maslinoven uju, zažutit na polumisece iskrižanu kapulu, pa kal ta kapula samre, kal svehne i dobije boju starega zlata, ondac ćemo na nje kroz prste dodavat zagrabjenu krv ol janca iz tećice, ku smo prstiman raštrampali – jerbo je inkordana i ne da se misit - pa, brez stavat mišajuć, drvenjačon ćemo vrtit dokle nan se krv lipo ne pofriga, dokle ne pokafeni. To će reć jednu četiri-pet minutih - i to ako? - stalno mišajuć drvenjačon da ne zagori.

Pokle se je krv lipo pofrigala, kal je ćapala nu škuro kafenu boju (ka tikovina oli bakelit), zlicon ćemo je izvadit na pijat, poškropit maslinovin ujen, posut papron, iskrižanin lukon i petrusimulon pa, sa feton oli dvi kruha, lipo blagovat i guštat. Vrilo, ne vaja kad ostine!

Krv od janca kuhana 

Osnovni uvjeti:

mišćanin ki jema janca

janjac, njegova krv, luk

maslinovo uje

sol, papar, petrusimul

Komu se ne gadi krv, navisit će bronzin s vodon na komoštre u kominu, oli će metnut kotlenku na trinoge navrh ognja, oli će upalit teću na špaheru, i… čekat da uzavre. Voda, kal je uzavrila, posolit će se su grezon soljon. Ondac ćemo u tećici - u kon smo izmišali krv, uje, sol i papar - nožon okružit inkordanu krv, da se odlipi od late, pa ćemo tećicu okrenut naopako na pijat, kako bismo iz nje iskrenuli gomojicu ol krvi, ča sada sliči na manju torticu ol umendul i orihov: ko rožada, oli ko puding (pardon: buding!). E, i tu krv vaja uvalit u bronzin, oli kotlenku, oli teću na špaheru… sa uzavrenon posoljenon vodon. 

Neka se kuha, a digod ćemo ti mali doboš ol krvi obrnut i na drugu bandu, da se boje iskuha.

Pokle je pasalo nikih kvarat od ure, kal je krv skuhana, šupijačon ćemo je izvadit iz bronzina, kotlenke, teće, pota… već u čen se je kuhala, i metnut ćemo je na tajer, oval oli na kakov pijat, pa je molat da se ohladi. Kal je krv fermala se dimit, kal se je ohladila, ondac ćemo je iskrižat nožon na koskice veličine gumice u skuli za brisit, oli po škatule ol furminih. Te komade kuhane krvi poškropit ćemo su maslinovin ujen, bokun popaprit, ter ćemo jih posut usitno iskrižanin lukon i petrusimulon. 

P. S. Ovako parićana krv, skuhana - ne i začinjena, pazi! - meće se i u tripice.