DALMATINSKA KUŽINA: Kunetina sa bižon i kadujon

Osnovni uvjeti:

kunetina, biž, kaduja
maslinovo uje, kapula, luk, sol
petrusimul, slalka mlivena paprika
konšerva, bilo vino, prošek, papar, voda

Najprvo ćemo kunca lipo rasić nakomade, prama pozicijan, pa ćemo ondac te komade mesa popržit na naglo na maslinoven uju sa svih stran. Čin je ionako bilo meso jošćec višje pobililo, izvadit ćemo ga vanka, pa ćemo na ton iston masnoći šufigat na koskice iskrižanu kapulu. Pokle je kapula svehla, uvalit ćemo na nje popečene komade kunca, posut jih sa usitno iskrižanin lukon i petrusimulon, pa jih daje žutit pe-šest minutih. Ondac ćemo sve oblit su dva žmula vina, pa pokle uzavre molat da tihula nalagahno.

U manjon tećici navisit ćemo posoljenu vodu, pa u njon do malo vrimena dopolak iskuhat biž. Ti ćemo biž dodat kuncu ča se jurve kuha tri kvarta od ure, a sa bižon dodat ćemo na zlici soli, sedan-osan ošušenih listov kaduje, na kućarinu slalke mlivene paprike, bokun konšerve i na vrh noža papra. Oblit ćemo to jošćec sa žmulon vina i žmulon prošeka, pa neka daje piruca dokle se biž ne iskuha do kraja, a meso lipo ne smekša.