DALMATINSKA KUŽINA: Lignjuni sa riziman u špaheru

Osnovni uvjeti:

lignjuni, kumpiri, rizi

ruzmarin, bilo vino

maslinovo uje, sol, papar

Dobro je, lignjuni nisu lignje, ka ča hubotun ni hubotnica, ma nĩ ni razlika u cini meju njiman na peškariji baš pošćena. Koliko se, tobože, kilih lignjunih moge kupit za kilo liganj? Ovisi obo dnevu (je brž petak, oli prvi dan, Čista srida i Veli petak oli utorij), ma ovisi i obo ten koko čega peškaruše jemadu u pajeriman na banciman. Kako god bilo, diferenca u guštu meju lignjan i lignjuniman ni baš nolika koliko to kažije cina. Tin boje za nega ča kupuje.

Vo je bokun neobišnija riceta, jerbo se lignjuni po običaju u špaheru parićajedu su kumpiriman, a vode ćemo metnut jošćec i dvi-tri ćikare rizih, već naprama ten koko je lignjunih i koko će judih jist. Ćikara rizih po čoviku, oli po ženi: nima vode diskriminacije.

Napodan lašćere vaja ulit maslinovega uja da poplivi lno, a ondac na to tuka posložit operene, ispurgane, ispuliškane i posoljene lignjune. Meju njih postivat ćemo i na veće komade iskrižane kumpire, posoljene, dodat dvi-tri grančice ruzmarina i razasut meju svin tin dvi-tri ćikare rizih, rekli smo: naprama ten koko je lignjunih i koko će judih bit za stolon. Sve vaja dobro oblit su bilin vinon i posut su papron. Pokle se je sve metnulo, vaja dolit jošćec u žmulu vode, doklen sve skupa dobro ne oplivi. Vada se sve dobro zatopi, jerbo ćedu rizi pospugat puno vodurine. Ondac ćemo lašćeru poklopit sa aluminijskon folijon i izbužat je nožon na višje mistih.

Pa ćemo je uvalit u špaher na sridnje žeštoki temperamenat uru, uru i kvarat vrimena. Digod se moge pinku protrest su lašćeron, a na po puta pečanje moge se otvorit, pa kontrolat je tuka jošćec bokun sve izburtit, oli u žmulu vode dolit.