DALMATINSKA KUŽINA: Makaruni na vreteno

Osnovni uvjeti:

brašno, jaja

voda, sol, žumance

Jošćec i sadar vidin nonu kako misi tisto i kako sa lazanjuron čini nu kartinu ol tista, ku će, do malo vrimena, rizat s onin ručnin cirkularićen ča se zove rodela. Ne moren pogodit tu dišiplinu ruke: i nu kal dlanon misi tisto, mišajuć brašno sa soli i jajiman, i nu ča ko redalicon poteže ravne crte čineć ne romboide ki ćedu, do malo vrimena, zamotat se kolo vretena, i učinit se u pravi domaći, starinski makarun. E, tako je to bilo nikada…

A, da bi bilo i sada, vaja učinit kako gre… 

Najpri ćemo na stol iskrenut jednu kilo glalkega brašna, na stog; nako, koda je vulkan, recmo Etna na Siciliji. Buduć da mi to brašno nismo iskrenuli kako mu drago, vengo smo ga prosuli tako da bude u obliku briga, sal ćemo mu ćivericu poravnat, izdubajuć u ten manju jamku. (Bože, kako sam vo lipo napisa!?) U tu jamku ćemo iskrenut pet jaj, usut u šaki soli, naprama ten koliko je brašna, i lipo ćemo sve to đentilo rukan izmisit: koda smo bili te sriće pa da smo žensku od strane škine jamali prilike lipo masirat po sisan…! Ona sve govori: 'Nemoj, nemoj! More nas kogod vidit…!' A znaš i ti, i ona, kako ona misli: 'Ajme, nemoj stat, nemoj stat!' E, sad, kako ti znaš da ona ne zna da ti znaš ča ona misli, ti samo lipo nastaviš misit, i misit, i misit… i, kad otvoriš oči misleć kako misiš sise, brž ćeš se pinkicu šokirat kal svatiš da ti je no meju prstiman - tisto! A ne sise! I braduvnica. Jebi ga sad, nema veze, utišiš se s tin ča si sigur da ti je u rukan povjereno silno bogatstvo, bogatstvo tista ko će se doskora i najskoli pritvorit u obid.

Je, tisto smo rukan izmisili, ma se no pritvara u granule, kuglice. Pa ćemo lipo to oblit vodon i ondac će se tisto moć učinit u, kako se to kaže: jednoličnu smjesu. Tu 'jednoličnu smjesu' dobro ćemo na stolu izmisit, pa ćemo nožon okinut jedan komad i dobro ga lazanjuron ispripleskat, posipajuć ga brašnon da nan se ne zalipi: bilo za stol, bilo za lazanjur. Čagod višje stanjamo tisto, to će tisto za makarune bit boje.

Pokle smo stanjili tisto na stolu do kraja, vazest ćemo u ruku rodelu, ni tobože ručni cirkularić, i š njin ćemo rasić tisto najprvo u jednen redu, a ondac i u drugen, pazeć da nan na stolu ostanedu ne puno velike kvadrele (moje pokojne bižnone, Mande i Katina, bidu rekle: romboidi!), ma ne ni puno male. Kvadrele. Jednu četiri centimetra širine je prava mira. Pa ćemo ondac š njiman na vreteno, oli na drvenjaču, vodeć računa obo ten da nan se dobro zalipi tisto nonde di se dodirije kal ga se obrne okolo (da se u kuhanji ne odlipidu i ne oldilidu).

Svaki tako na ruke učinjeni makarun složit ćemo na stol ki smo prin tega bokun posuli brašnon, i bilo bi dobro da se makarun jema kal prošušit na zraku oli na propuhu. Ukoliko vrime da, posli jednu tri-četiri ure, kal su se makaruni čagod rašušili na zraku, skuhat ćemo jih u posoljenon vodi. Kal isplivadu, neka jošćec glogojidu dva-tri minuta i - vaja jih šupijačon izvadit vanka.

Može jih se jist tako da jih se oblije kakovin šugon ol mesa oli divjači, a more jih se inkartat i kakovin safton od pečurav, verdure oli brujetadon i lešadon ol ribe.