DALMATINSKA KUŽINA: Orzet ol kozletine

Pupu ol stegna ol kozlića isić ćemo na koskice, pa metnut u pijat sa strane. Juhu ol kozletine oli janjetine upalit ćemo u kakovon tećici, pa kad uzavre u nje ćemo metnut kuhat u pašabrodu opereno orzo. A ondac ćemo na maslinoven uju napodan kakove teće šufigat usitno iskrižanu kapulu, posolit je da prin svehne, i na kraju ćemo dodat iskidani luk i petrusimul. 

Pokle se je sve to izdinstalo iskrenut ćemo narizanu kozletinu, pa šufigavat kvarat od ure doklegod ne izvitri sva voda ča će je meso olpustit. Sadar ćemo zalit sa žmulon vina, pa malo kašnje oblit sa na kutlu juhe, uvalit kigod klinčić, na kućarinu kanele i papra, ka i kigod list suhe kaduje. Je uzavrilo, smanjit ćemo skroz-naskroz da piruca ispotiha, oblivajuć svo vrime bilin vinon i juhon. Kal je orzo napolak iskuhano u jusi, šupijačon ćemo ga pribacit u kozletinu, ter molat da to zajedno kuha nalagahno doklegod se sve lipo ne prožme i smekša. Prin samega kraja ulit ćemo i u žmulu prošeka, pa da domaći prošek da dodatni šmek. Ovi se orzet najskoli more posut izgratanin siron, a more se sir metnut i malo prin samega kraja, tako da i on da jednu notu višje.