DALMATINSKA KUŽINA: Palačinke

Osnovni uvjeti:

jaja, mliko

mineralna voda (mlaka voda, šoda)

sojino uje, rakija (rum, vanilin-šečer)

Napisat ricetu za učinit palačinke, pari mi se, ništo je najtežje u cilon dalmatinskon gastronomiji…! Zašto? Zato, ča jema toliko različitih načinih kako se palačinke činidu, da bi bilo najboje napisat libar samo obo ten kako se frigadu palačinke… Ko sa pašticadon: koliko kužinih, toliko ricetih…!

Ma, kako su palačinke, ustvari, jedan pluskvamjednostavan prezent, nikako perfekt, ja ću se vodit onin načinon, normalno, kako je to činila moja nona, a ne tamo nikakova – mona. Dunkve, ne mona, vengo moja dobra nona, vako je činila palačinke…

U plastičnu terinu najprvo bi iskrenula, pritpostavka, dva jaja. Recmo da se va doža parićaje su dva jaja. E, ondac se u ta jaja prospe meju prstiman pinkicu soli, u bićerinu rakije (more i ruma), na kućarinu sojinega uja, pa se sve dobro žicon ispaštroća. Dobro se vada istuče. Pa ćemo ondac u to ulit obilati žmul mlika i žmul teple vode, ter dodat na kućarinu šode i jedan vanilin-šečer. (E, da, kogod neće mećat teplu vodu, vengo će ulit mineralnu, radensku, a kogod će samo duplat količinu mlika, već naprama ten kako ko voli. Normalno, kogod će u smjesu izgratat i pinkicu kore ol naranče i limuna, razumili smo se: šekondi gušti!) I sve ćemo to dobro ispromišat, da se sve skupa lipo prožme.

Ondac ćemo počet pomalo iskrićat glalkega brašna, malo po malo, mišat ne pristajuć, dokle ne dobijemo gustoću koja nan najviše odgovara. Ako nan je uteklo brašna, dolit ćemo jošćec bokun mlika, nema problema…

Pokle smo smjesu učinili kako spada, ondac ćemo u pršuru ulit malo višje ol deca sojinega uja. A kad se uje užešći, izlit ćemo ga u parićanu ćikaru sa strane, pa ćemo ondac u tu nauljenu i vrilu pršuru pomnjivo izlit na kutlu smjese, pazeć da se razlije na sve bande podjednako, da dobijemo tanahnu i na svin mistiman jednaku palačinku.

Je pasalao malo vrimena, nožon ćemo lagahno polkopat palačinku sa svih stran, pa kal se je skroz ofrankala naglin pokreton ćemo je bacit u zrak, tako da se u zraku obrne, pa pade nase u pršuru sa druge bande… I ondac tako jopeta na oganj, po minuta i – gotovo! Iskrenut ćemo je na plilki pijat, pa tako slagat svaku ča gre daje, a ondac ćemo jih na kraju namazat mermeladon, eurokremon oli samo posut cukron, pa zamotat u guju i stivavat na drugi plilki pijat.