DALMATINSKA KUŽINA: Pinetada ol pečurav rujnic
'Maestrochef' Siniša Vuković piše o tradicionalnoj dalmatinskoj spizi
Jesmo očistili pečurve ol zemje i suhega lišća? Jesmo. Jesmo dobro ostrgali svu šporkicu š njih odizgari? Jesmo. E, pa kal jesmo, kal smo učinili sve to, ondac ćemo iskrižat kapulu na koskice. Napodan teće užgat ćemo maslinovo uje, pa na njemu šufigavat vu kapulu. Na po puta, po običaju, posut ćemo je soljon i, pokle je svehla i zastaklila se, u nje ćemo iskrenut na komadiće iskidane rujnice i usitno iskrižan luk i petrusimul. Do malo vrimena pečurve ćedu pustit vodu, a mi ćemo pustit da ta voda ižvampije. Je ižvampila, oblit ćemo to sve žmulon bilega vina, pa u to dodat list javora, malo mravinca, na trakice iskidane kore od po limuna i sok, ter na vrh noža slalke mlivene paprike i papra. Okrenut ćemo dva puta drvenjačon, nakon čega ćemo spizu posut su kanelon i nožamušćadon, a dodat ćemo i kigod klinčić. Neka sadar to kuha nalagahno kolo uru vrimena.
Kako zafali, oblit ćemo šug bilin vinon, a prin samega kraja dodat ćemo na zlici konšerve i po žmula prošeka. Je pasalo jošćec kvarat od ure, sa šugon ćemo oblit pinete, iskuhane u posoljenon vodi.
