DALMATINSKA KUŽINA: Rafijoli 'selaški'

Osnovni uvjeti: 

Tisto: 3 žumanca, 1 cilo jaje, 20 dek masti, 20 dek cukra, 1 vanilija, 1 prašak za pecivo, 6 zlic mlika, kora ol naranče i limuna, sol, brašno
Smjesa: 20 dek umendul, 3 bilanca, 1 dec mlika, 1 zlica cukra, 1 vanilija, rum, 2 zlice mermelade
Na kraju: razvodnjeni liker ol gorke umendule (gorčice), cukar

Fala dragen Bogu, prin svake govorancije obo rafijoliman, vaja naprvu špjegat kako je važna stvar da su jaja domaća, da nisu izvađena iz frižidera, vengo vada budedu na sobnen temperamentu. Pa ćemo odvojit tri žumanca ol bilanca: tri bilanca ćemo stavit u tećicu nastranu, a tri žumanca ćemo uvalit u jednu terinu. Na ta tri žumanca prolit ćemo još jedno cilo jaje. Ondac ćemo usut 20 dek cukra i isto toliko masti ol bahića, po jednu vaniliju i prašak za pecivo, 6 žlic mlika, naprstak soli i izgratane kore ol naranče i limuna. Sve ćemo dobro istuć mikseron, dokle se sve ne učini u jednu lipu žutu smjesu.

Pokle smo to dobro ispaštroćali, vazest ćemo drvenjaču pa dodavat pomalo glalko brašno, vrteć ne pristajuć. Brašno vaja dodavat doklegod se ruka ne umori, a ondac se - sadar već tisto! - iskrene na stol ča smo ga langvido posuli brašnon. Pa ćemo ga rukan nastavit misit, posipajuć ga brašnon, dokle gruda ne dobije potribnu gustoću. A kada gruda dobije potribnu gustoću? E, jebiga, to van ne mogu objasnit: vada to učinite nikoliko putih, po mogućnosti da falijete, pa ondac do kraja života znate kakovo to tisto vada bude pod prstiman, kal je pristupi momenat za fermat mećat višje brašna. Inšoma, pokle smo umisili tisto, molat ćemo ga da počine jednu uru vrimena.

Za to vrime učinit ćemo smjesu. U latenen potiću smlačit ćemo kolo dec mlika, u ken ćemo raskravit na zlici cukra i jednu vaniliju. Ne smi se mliko zaparit, samo ga vaja smlačit! Ona tri bilanca ča su nan bila ostala na prvu, kal smo jih oldvajali ol žumancih, dobro ćemo istuć dokle ne dobijemo čvrstu pinu. U tu pinu ćemo umutit 20 dek umendul, suhih umendul, ča smo jih samlili u non makini ka se zavida na kraj stola. Drvenjačon dobro izburtimo pinu ol bilanca sa umendulan, ulijemo no raškaldano mliko, po bićerina ruma i dvi zlice domaće mermelade (ol smokav, prasak oli sliv). I sve dobro izmišamo doklegod ne dobijemo lipu kremastu masu.

Tisto je oldahlo. Okinemo komad, primisimo ga na pobrašnjenen stolu, i lazanjuron razvajamo u ča je moguće pravilniju kvadrelu. Pa ćemo ondac ćapat na kućarinu smjese i metnut je u jedan kraj na tistu, kažiprston druge ruke gurajuć je da ostane. I tako daje. Ondac ćemo privrnut tisto priko tega, pomnjivo, da ne pukne. Jesmo to učinili, ćapat ćemo ćikaru ol čaja, i š njon okinut budući rafijol. Ovode je tajna: ćikara s kojon se kida rafijol vada bude debelih rubov, tako da kada se rafijol kida, da se tisto dobro spoji na šavu. I neće puknut kal se bude peklo! Vode falijedu puste domaćice, jerbo rafijole kidadu žmuliman, tankiman, koji dobro rižedu, ma ne vežedu gornje tisto sa dojnin: u nen momentu kal se rafijol oldvaja ol tista na stolu. To vaja jemat na pameti. 

I, kako se koji rafijol ćikaron okine, tako ga se metne u lašćeru u kon nema ničesa: ni masnoće ni brašna. Tisto je već dosta samo po sebi iznutra namašćano i za pečanju jurve parićano. 

Postivane rafijole složit ćemo u peć i peć na 180 stupnjev, kolo kvarat od ure. Vaja jih stalno jemat na oku, tako da ne bidu utekli, tobože izgorili. Kal dobijedu nu lipu boju: š njiman vanka! Neka u lašćeri pinku počinedu, malo se ohladidu, pa ćemo jih izvadit i pustit da skroz ostinedu. A pokle su došli studeni, usupat ćemo jih nabrzihen odizgari u razvodnjeni liker ol gorčice, gorke umendule, pa ćemo jih umejat u cukar. Rafijoli moradu bit hladni za ovo, jerbo ako su tepli, puno ćedu upit tekućine i neće se cukar dobro prilipit za njih. Kogod jih pinelićon maže sa bilancen, a kogod sa mlikon. Običaj je da jih se maže sa anizeton. Ja san jih usupa u gorčicu, tako da se ti gušt veže sa umendulan ča su unutra.