Dalmatinski portal koristi 'kolačiće' za što trebamo Vašu privolu. Ako nam želite pomoći u prikupljanju podataka za analitičke odnosno statističke svrhe, molimo Vas prihvaćanje 'kolačića' za analitiku. Naša web stranica koristi i marketinške 'kolačiće' zbog pružanja marketinškog sadržaja za koje od Vas također trebamo privolu. Bit ćemo sretni ako se slažete s tim jer Vam tako možemo ponuditi najbolje korisničko iskustvo.

Saznaj više
DALMATINSKA KUŽINA: Sirnice i garitule
Dalmatinska kužina Piše: Siniša Vuković

DALMATINSKA KUŽINA: Sirnice i garitule

'Maestrochef' Siniša Vuković piše o tradicionalnoj dalmatinskoj spizi

Osnovni uvjeti: 

5 jaj, ½ žmula mlika, ekstrakt za sirnice
vanilin-šečer, 1 zlica cukra, sol, rum, rakija
kora od 1 naranče i 1 limuna, 1 koska kvasa
1 zlica masti i isto toko margarina, bilance jaja, prošek

Normalno, ne more se zamislit Uskrs, a da se ne umisidu i ne ispečedu sirnice. Ka i sa pašticadon, brujeton, orahovicon: koliko žen, toliko vrstih – sirnic! Ova metne malo manje vega, ona malo veće nega…


U von varijanti najprvo ćemo smlačit pinku mliko i u njemu raskravit zlicu cukra, a kal se raskravi ondac ćemo u to iskrižat koskicu kvasa i molat zbande da se kvas raspade. U drugen potiću raskravit ćemo mast, pa u njon margarin. I vo ćemo odložit sa strane, da se ohladi, jerbo ne smi vrila masnoća u jaja da se ne bidu inkordala. Jaja…

Cila jaja iskrenut ćemo u jednu terinu, a na svako jaje dodat ćemo na kućarinu cukra i pinku soli. Mikseron ćemo mišat jaja dokle ne dojdedu deboto ko pina, a prama kraju ćemo pomalo dolivat masnoću, mišat ne pristajuć. Pa ćemo u to kronut kugod kapju ekstrakta ol sirnic, u čepu ruma i bićerinu rakije, izgratane kore od limuna i naranče, i vanilin-šečer. I sve ćemo to sadar dobro drvenjačon izburtit. Pa ćemo u to dolit u mliku raskravjeni kvas i pomalo dodavat u žmulu brašna, stalno mišajuć. Brašno se dodaje naprama ten koliko tisto pita. Pokle zaboli ruka ol mišanja, na stol će se posut langvido brašna, pa će se na to iskrenut tisto i misit će ga se uz dodavanje brašna doklegod ne dobije potribnu gustoću. 

Kal je to gotovo, grudu tista ćemo molat da kisne dvi ure uteplo, pokrivenu kuhinjskon krpon.

Je pasalo toko vrimena, tisto ćemo pripomisit i razdilit u dvi manje grudice, ke ćemo jopeta složit na dasku i pustit da daje kisnedu, pokrivene krpon. Kal su se poldigle, kal su uskisle, a to je jednu po ure, ondac ćemo sa nožican učinit križ na vrhu, tako da jih dva puta zarižemo. Moja nona bi sadar vazela komad kartuna (ol vriće za mekine oli za kukuruz, oli bi vazela škartoc), pinku bi ga namazala mašćon, na nje bi metnula uskisnutu sirnicu i stavila bi je peć u špaher. A danas se to čini tako da se sirnice složidu u lašćeru ča su pomazane ujen i langvido posute brašnon. Pa se onda te lašćere uvalidu u pećicu i pečedu na 180 stupnjev.

Dokle se sirnice pečedu, u latenen pijatu istuć ćemo jedno bilance sa pinkicu soli u sebi. Prama zvuku u latenen pijatu znat ćeš kal je bilance dosta istučeno: kal počme tupo olzvanjat! Ti se zvuk ne more čut u pijatu ol majolike (zato se danas tuče bilance sa mikseron). E, pokle je pasalo kojih kvarat od ure oli dvadesetak minutih ča su se sirnice pekle u špaheru, pa su ćapale nu lipu boju, izvadit ćemo jih vanka i pomazat odizgari sa pinelićen ča smo ga usupali u prošek oli u mliko, ter ćemo jih namazat so nin istučenin bilancen ko ćemo posut cukron. 

Sirnice ćemo tornat nase u špaher i peć još malo vrimena, dokle se no bilance i cukar lipo ne zazlatidu.

Garitule


Sirnice su se činile za 'velike', a garitule su se činile za – dicu!

E, od istega tista – ol kega, vidili smo, umisili smo tisto za sirnice – učinit ćemo i – garitule. Te lipe pletenice, kojiman su se veselila dica na Velu subotu navečer, pokle bidu se vratila s ocen i materon, s nonoton i nonon (ako su bila te sriće da su jih jemala!), jile su se navečer kasno pokle bi svršila funkcija u crikvi i pokle bi se fameja vratila doma.

A jile su se i sutradan, Bogu fala, na Uskrs!

Ni tote bilo puno filožofije: okinedu se tri jednaka komada tista, pa se ona ondac rukan izvajadu u guju, ko kal se misidu njoci. Ondac ćemo tri kraja metnut na jedno misto, u tu 'glavu' metnut ćemo utvrdo iskuhano jaje, pa ćemo ol krakov isplest pletenicu, isplest garitulu. Pa ćemo je metnut peć u peć. Pokle je pasalo kojih kvarat od ure, pokle je garitula ćapala nu lipu boju karamele: izvadit ćemo je vanka i pustit da se ohladi.

Vaša reakcija na temu