DALMATINSKA KUŽINA: Špuži na gradelan

Osnovni uvjeti:

kondicija za šetnju
ne bojit se guj
špuži, greza sol, papar
maslinovo uje

Na pramaliće, pokle izbije mlada trava sva slalka od mladosti i sva slana ol mora ča ga vitar raznosi okolo, pa kal daž smoči zemju i gomile: špuži stanedu plazit okolo, tražeć pašu za najist se, tražeć čobana ki će jih skupit, odnit doma i metnut u kašetu u kon ćedu se ispurgat, u kon ćedu se dobro izbalit… Pet-šest dan neka stojidu u kašeti. Jobišno su se špuži držali u non kašeti u kon su se gonile višnje iz gore u Zadrugu.

Vaja reć jošćec i vo: da bidu se špuži ispurgali, tobože izbalili, judi su užali na ušću kućice – nonde di je samo juska, brez mesa – probit bužicu pa špuže obisit na žicu, na findefer, ter bidu jih tako pustili tih pet-šest dan da se ispurgadu, ilitiga izbalidu. Pa no, gledaš, kako na slina cidi iz njih – mejsusovo sveto bilo…! – koda visi baledina iz nosa čejadina ča se je dobro prihladi i jema barenko tristidevet gradih temperamanta fibre…!?

A jema san čut i vakih štorij: špuža ne triba ostavjat puste dane da se prugaje, vengo se omar more š njin na gradele! Slaji su u non baledini! Bom-pro, mislin se…! Šekondi gušti. A kogod jih mola samo dan-dva da se izbalidu i onda jih omar stanedu parićavat…

Prin vengo ča partimo daje, triba špjegat i zdatat jošćec i ovo: špuži su puno boji na pramaliće, vengo ča su najesen, jerbo na pramaliće jemadu manje japnja u sebi, a japanj nin je potriban najesen, buduć da se za zimu vada zatvoridu i učinidu nu tanahnu opnicu na ušću ol kućice, kako bidu ča boje prikumburili zimu. Da nin bude teplije, da ne bidu ostinuli, pa krepali ol studenice.

E, sadar, pokle su se špuži ispurgali, pokle su se izbalili, moremo pensat obo ten kako ćemo jih lipo parićat. U ven slučaju, peć ćemo jih na gradelan.

Naložit ćemo oganj na kominu. Žerava vada bude žeštoka. Pa ćemo na gradele postivat špuže sa kućicon prama doli, a buža neka gleda uzbrdo, ko tuba oli bombardina u limenon glazbi. Na pijatiću ćemo sadar pomišat papar i maslinovo uje, pa ćemo kućarinon kronut malo uja s papron u svakega špuža. I posut ćemo ga s pinkicu greze soli.

I, s gradelan gremo nada žeravu. Desetak minutih ćedu se peć, sve pivajuć koda su u trejatru, u operi, a ondac ćedu fermat, umuknut, zanimit ko staro čejade prid smrt. I, ča sadar…? Sadar su, bome, gotovi!

Pa ćemo jih izvadit na pijat i odnit na stol. Ondac ćemo sa šprajkon, svakega sebice, vadit iz kućice. Na govna bacit ćemo ća, a meso ćemo jošćec pinkicu usupat na pijat u maslinovo uje i papar, pa š njin ravno u – justa!