DALMATINSKA KUŽINA: Svinjske noge na lešo

Osnovni uvjeti:

suhe noge ol bahića
voda, sol, kapula
kumpir, javor, pulenta

Suhe noge ol bahića (prasca, svinje, gudana) zasić ćemo bokun nožon izmeju papak, a kožu na nikoliko mistih vaja isto tako zarizat, kako bi se boje skuhale, i kako bidu boje pustile gušte iz mesa i košća.

Pa ćemo noge metnut u hladnu vodu, pinku ćemo jih posolit, ma pomnjivo, jerbo je suho meso slano (boje je dodat soli na kraju, ako bude potriba). Sa suhin nogan u bronzin ćemo uvalit i jednu kapulu, dva lista javora, dva očišćena kumpira u komadu i sve to skupa pustit da kuha nalagahno dvi, dvi ipo ure.

Pokle je odkuhalo koko je bila potriba, noge ćemo izvadit na pijat, a kumpir ćemo iskrižat na fete, popaprit s friškin papron, i zalit s po kutla juhe u kon se je sve to skupa kuhalo. 

Pulenta na nogan ol bahića

Ovode je najvažnija juha u kojon su se kuhale suhe i dimjene noge ol bahića. Ona lipa bila juha, deboto ko mliko. Normalno, to će se pročitat na drugen mistu, pa će se moć pristupit parićavanju ve lipe spize, ča su je guštali jist naši nonoti i none.

Pokle su se suhe noge ol bahića dobre dvi ure kuhale u juhi, ondac ćemo tu juhu procidit, a kapulu i kumpir, ki su se ionako počeli raspadat za vrime dugaške kuhanje, perunon ćemo dobro propasirat. U von jusi sadar, kal jopeta uzavre, skuhat ćemo u šaki pulente, stalno mišajuć. Suho meso je masno, pa bi i juha morala bit bokun masnija, a ako fali masnoće, skupa s pulenton ulit ćemo i pinku maslinovega uja.

Nogu ol bahića zalit ćemo iskuhanon pulenton, pa molat da se sve skupa lipo zgusne, inkorda i ostine.