DALMATINSKA KUŽINA: Torta od umendul
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
14 jaj, 14 zlic cukra
40 dek umendul, 2 vanilije, keksi
sol, rum, naranča, limun, mast, brašno
margarin, ćikulata za kuhanje
Prid očiman mi je i sadar nona u kužini kako mi za rojeni dan čini tortu. Ne mogu reć ništa drugo, samo 'torta', jerbo se u stara doba, u starin kužinican, nisu činile puste vrste torat, vengo samo jedna vrsta, ma sa dva okusa: od umendul i od orihov (oli pomišano). Moja nona, pa ondac i moja mater, najvišje su je činile od umendul, pa ću tako i ja, a vi kako znate.
Na staron makinjeti samlit ćemo 40 dek umendul. Pa ćemo razbit 14 jaj odvajajuć bilanca ol žumancih. Omar ćemo dobro istuć bilanca sebice i molat pinu zbande, a ondac ćemo, u drugu terinu, na svako žumance iskrenut po jednu zlicu cukra, znači 14 (ravnih velih zlic, ne pripunjenih), usut ćemo i 2 vanilije, meju prstiman soli i u bićerinu ruma. To dobro vaja istuć, dokle se cukar skroz ne raskravi i dokle smjesa ne postane lipo svitlo žuta i rilka, deboto ko za palačinke. Iskrenut ćemo sadar u to i izgratane kore od jedne naranče i jednega limuna, pa dobro drvenjačon izmutit.
Sadar smo vej došli u fazu za dodat istučeno bilance i umendule. Njih ćemo u smjesu istučenih žumancih dodavat lipo pomalo, dvi-tri zlice bilanca, dvi-tri zlice mlivenih umendul. Kal smo dobro zahmurili te zlice ol bilanca i umendul, ponavjat ćemo tako dokle sve ne potrošimo, a kadikad ćemo u to mećat i na zlici praha ol šest-sedan izmrvjenih keksih (ča smo jih istrvili u non iston makinjeti). Kogod meće i prezlu, da bi torta poslin bila rahlija, a kogod stavi misto keksih kugod zlicu brašna i u njemu promišani prašak za pecivo da se sigurije digne. Meni nona je činila kako san zdata, i svaki put bi non se digla. Torta, mislin…
Pokle smo sve dobro izmutili, učinili smjesu, ondac ćemo vazest teću oli kalup za torte (nona je to kuhala u teći, u špaheru na drva, regulajuć oganj aloći, ča ja baš i neman kuraja provat). Iznutra se teća oli kalup pomažedu mašćon (naročito u krajiman ol podanka), pa se po ton masti prospe langvido brašna, da se torta ne zalipi. I sadar, u tu namašćanu teću, oli kalup, pomalo ćemo izlit žbativenu smjesu, ulivajuć je u sri-sride, kako bi se ona ravnomjerno rasporedila na sve bande podjednako. Kal smo sve ulili, malo ćemo protrguzat s tećon, tako da se skroz-naskroz smjesa izravna.
Pa ćemo je metnut na raštele u sri pećice ol špahera, na temperamenat ol 190 stupnjev. Neka se tako peče dobrih tri kvarta od ure, brez otvarajuć špaher da se ne rashladi, pa da torta ne pade; jerbo, ako pade u po pečanje – gotovo! Neće se višje dignut. Torta, mislin… A je pasalo toko vrimena koko smo rekli, i je torta dobila nu lipu škurokafenu boju i na sridi se malo digla, ubost ćemo je štikadenton pa, ako je štikadent suh, ugasit ćemo pećicu, a ako je jošćec bokun umidan, ondac ćemo peć jošćec desetak minutih.
A kal je sve gotovo, ondac ćemo špaher ugasit zaposve, otvorit vrata ol pećice dopolak, pokrit tortu sa folijon i molat je još pe-deset minutih da ostane unutra, da se ne šokira kal se naglo izvadi, pa da ne pade ili ide naopako. Posli tega izvadit ćemo je vanka, stavit na nje pijat, obrnut je naopako ko u saltu mortale (pardon: saltu tortale), tako da ona iz teće ispade na pijat. Ako niste dobro bili namašćali teću, mogla bi se torta zalipit za kraje, pa ćete je ondac nožon lagahno ofrankat okolo. Molat ćemo je tako iskrenutu na pijat da ostine skroz, kako bismo je mogli namazat ćikulaton i po njon čagod istučenin bilancon napisat.
Moća parićat tu ćikulatu.
Najprvo ćemo u tećici raskravit 15-20 dek margarina, pa ondac u njemu rastopit malo višje ol polak ćikulate za kuhanje, one od 20 dek. Torta vada ostine prin vengo ča ćemo je inkartavat raskravjenon ćikulaton, da nan puno ne upije. I ondac, pokle smo je lipo svu namazali i izravnali, molat ćemo da se ćikulata lipo polpuno skori i ostine, a moremo je metnut i u frižider.
Sadar ćemo u terinu iskrenut dva bilanca ol jaj, mrvicu jih posolit i kronut po njiman kugod kapju soka od limuna. Kugog kapju, ma ne depju! Te se kapje limuna mećedu da se pina, pokle je istučemo, ne raspiša. Moja bi nona tu pinu metnula u saket ol najilona, nožican mu prisikla jedan kantun, i stiskajuć je kroz saket š njon, ton pinon, pisala po torti čestitku i crtala ukrase. Umisto ve pine, more se istuć i šlag.
