DALMATINSKA KUŽINA: Tripice ol janca

Osnovni uvjeti: 

dilovi zaklanega janca: (dropčić, nogice, popošnjak, čriva)
kapula, voda, javor
sol, papar, selen, pančeta
crvena paprika, kumpiri
pasata ol pomidora, kuhana krv

Pri svakega govorenja obo tripican, ke se digod rečedu fileki, vaja bit načisto s tin da se čoviku ništa ne smi gadit, i da jema apetida za provat čagod spize koja u sebi jema i kigod neobičan sastojak. 

Prvo vaja u bronzinu, u slanon vodi, skuhat dobro-dobro operen dropčić ol janca, nogice, čriva i popošnjak ilitiga slipo crivo. U ti bronzin ćemo dodat jednu oli dvi kapule, i kojigod list selena i javora, kako bi se ubi oni jaki vonj ol droba, pa da ne bi komugod smrdilo. To se kuha jednu tri kvarta od ure, do uru, već naprama ten koliki je bi janjac. Nogice smo prvo natakli na oštri popečak, i opalili zlake na ognju, a ondac smo nožon izuli papke i ostrgali no dlak ča je ostalo meju nin dviman, nazovmo to tako, prstiman janca. E, tako opremjene nogice stavit ćemo kuhat u tripice. 

Kal je dropčić i no rešto skuhano, nožon ćemo na tajeru sve to razrizat na trakice. 

Sal ćemo u širokon teći metnut maslinovo uje da se stepli, ter ćemo u to usut na sitne koskice iskrižanu kapulu i isto tako iskrižanu pančetu. Posolit ćemo kapulu, normalno. Čin se je kapula zazlatila, a pančeta raskravila, na to ćemo dodat na trakice narizani dropčić, čriva, popošnjak i nogice ol janca. Niko vrime ćemo to šufigavat, dokle ne pusti vodu i počme se lipit za lno ol teće. Zalit ćemo to ondac sa jednu dva deca vode u kon su se kuhali dropčić i no sve drugo, pa ćemo bokun kašnje posut su crvenon paprikon i papron, lukon i petrusimulon, nakon čega ćemo sve to skupa zalit sa pasaton ol pomidorih. Posli jednu deset minutih u teću ćemo dodat kumpire iskrižane popoli, u obliku slova D, a more se dodat i još kigod komadić pančete. Kal je kumpir skuhan dopolak, ondac se u tripice doda na koske iskrižana iskuhana krv. Od ovega momenta, kal se dodala krv, višje se tripice ne smidu mišat zlicon, da se krv ne bi raspala, vengo sada vaja svaku toko tećon pinku protrest, ko kal se kuhadu brujet oli gregada. Iskuhan kumpir: gotove tripice.