DALMATINSKA KUŽINA: Volci na salatu

Osnovni uvjeti:

volci

maslinovo uje, kvasina

papar, sol, petrusimul

Za doseć volke vaja jemat masku i peraje - bome i disaljku - jerbo vaja plivajuć po površini odizgari nadlićat lno ol vale. Kako se ki volak upana, tako se parti prama doli. Volke je lako nać, jerbo oni znadu doć u podanak vale, u plićak. Pa dok se paredu čuke, špešo se more skupit i kigod volak.

Koliko san samo urih roni u Radonji, vali najbližjon mojin Selciman, u kon smo se svi mi, selaška dica, učili plivat…? Bila je krcata volciman, u litnjin miseciman, čista brez obzira na to ča je u njon bilo puno brodic… Judi su bili nikako pažjiviji prama prirodi, prama moru. Volci bidu se znali skupit na kakovon krepalini, pa bi jih se i po šest-sedan znalo nać na jednen mistu: i onih jobičnih, sa tupin roziman po sebi, ma i onih lišjih, manekenih, ča su nikako elegantniji i sa tanahnin roziman na ke se moreš i ubost ako ga puno jako ćapaš rukon (navlaš ondac ako je bokun dubje na podanku, pa ti pofali zraka, a ti želiš u priši agvantat ga i izronit puzgori…).

Mećale su se i trapule za volke, volkere, ke su se sastojale ol košća ča se ni do kraja oćuvalo, pa da njih to mami. Te su se kosti stavjale na jedno misto, i kalavale u valu, ne bi li namamili volke. Ma, kako su volci strvinari, hijene mora, zapravo podmorja, vavik si moga bit sigur da ćedu se ni ćapat na tu ješku. Pa zaroniš i… zagrabiš.

Metne jih se u hladnu vodu i š njiman na oganj. Jednu kvarat od ure neka se kuhadu, pokle voda uzavre, pa ćemo jih ondac - pokle smo prolili vodu ća, u zahod - jednega po jednega jaglon ol 'Singerice' izvadit vanka. Skalat ćemo sa mesa ni nohat, a butat ćemo ća i na govna iznutra…

Složit ćemo volke u duboki pijat, polit ujen i kvasinon, začinit soljon i papron, ter posut su pinku petrusimula.