DALMATINSKA KUŽINA: Vrijeme je za - sarme!
'Maestrochef' Siniša Vuković piše o tradicionalnoj dalmatinskoj spizi
Ka prvo, vaja nabavit dobru kiselu glavicu ol kupusa. Dobru kiselu glavisu ol kupusa, reka san. Ondac je važno da ti bikar dva puta sameje pupe ol junjetine i svinjetine, kako biš jema dobar matrejal za hodit daje. Dobar matrejal ol junjetine i svinjetine…
Glavicu ol kupusa ćemo raskupusat! List po list, pa ćemo ga oprat pod vodu, da ne bi bi puno kisel, ter ćemo ondac oštrin nožon okinut ni debji dil korena lista, ča prama kraju gre udebelo…
E, a ondac ćemo mliveno meso metnut u jednu veliku terinu, pa ćemo na to dodat usitno iskrižanu jednu veću kapulu, četiri-pet češjih luka, u ćikari rizih, desetak dek pančete i šaku iskrižanega petrusimula, pa ćemo, donapokon, sve to lipo posolit, popaprit, ter posut sa mlivenon slalkon paprikon i nožamušćadon. Sal gre no ča je najvažnije: u vu smjesu, ča smo je dobro rukan ispaštroćali, dodat ćemo u bićerinu teple vode, pa ćemo to jošćec bokun boje izmisit meju prstiman… Va voda je važna da nan se meso dobro sjubi sa svon ovon končon, a i lašnje će se iskuhat…
Eto ga! Pokle smo smjesu ispeštali rukan, ondac ćemo vazest ne listove ča smo jih oprali pod vodon, pa ćemo u svaki metnut dlanoviman i prstiman učinjeni komad smjese, veličine jaja, i list ćemo pomalo zamotat s tin da kraje zavrnemo prama unutra. Tako ćemo činit sve dokle ne potrošimo mliveno meso i listove ol kupusa.
A ne listove ol kupusa ča nan ostanedu nenapunjeni, narizat ćemo po dužini i prosut ćemo jih napodan široke teće. Ondac ćemo u tu teću postivat ošušena i dimjena lebra ol bahića, izmišajuć jih sa iskrižanin kupuson.
Pa kal smo to učinili, počet ćemo slagat sarme na to sve skupa, jednu do druge. Meju njiman ćemo bacit kugod polovicu češja ol luka i zasut kućarinon oli dva slalke mlivene paprike. I, nalit ćemo vode, taman toko da sarme oplividu.
Kal uzavre, smanjit ćemo oganj napolak, a ondac neka kuha nalagahno jednu dvi ure vrimena. Ne vaja ništa mišat, vengo se svako toko pinku zatrese sa tećon, ko kal se kuha brujet.
A pokle su sarme gotove, ondac se poslužidu uz pire ol kumpirih, i lipo se zalijedu juhon u kon su se kuhale.
