DALMATINSKA KUŽINA Anguja na spici

Osnovni uvjeti:

anguja, sol, maslinovo uje, soja
slalka mlivena paprika, kaduja, papar

Jošćec ko dite spominjen se kako je nono govori da u gustirni pol taracon, di se kupi voda ča sa kup na kući kroz konal i gurlu gre dreto doli u gustirnu, jema jedna anguja ča je je on bi pusti da čisti vodu. A to hoće reć da ta anguja ji batoglavce i drugu manjuš, beštijam ča gadi vodu. Gustrina, brez anguje, dezinfikovala bi se sa zagašenin japnjon iz burlane. I ondac si bi sigur da je voda dobra, da se more pit, i da ti neće doć proliv oli ča gorega.

To da se anguja drži u gustirni kako bi čistila vodu oldavna je zaboravjeno, jerbo se danas svega more kupit. A anguja se more kupit digod i na peškariji, oli će ti je nabavit prijatej iz Neretve, Omiša oli iz Solina, oli gori daje kolo Skradina, di anguje plivadu u Krki.

Kako gre po običaju i zanatu, anguju vaja najprvo dobro očistit, izvadeć non drob vanka, ter je isperuć i režentajuć pod vodon. (Prin tega moremo je ćapat livon rukon za glavu, a ondac je desnon zaokružit sa palcon i kažiprston, pa potegnut doli prama repu da ispuče košće u njon.) Tako parićanu anguju istrit ćemo krpon, pa ćemo je dobro posolit sitnon soljon, a u drob ćemo non metnut rukovicu suhe kaduje, slalke mlivene paprike i papra. Neka tako olpočije u ton začinji barenko dvi-tri ure, a dobro bi bilo i boje, pritpostavka cilu noć poklopjenu u frižideru. Ako ćemo je držat u ton koda marinadi malo vrimena, uru-dvi, ondac je moremo poškropit maslinovin ujen, a ako je jemamo voju držat u frižideru da prinoći, ondac ćemo je zalit sojinin oli suncokretovin ujen, jerbo će nan se maslinovo uje u tolikon duradi marinade užegnut, pa će 'palit'.

Ondac ćemo anguju nataknut na spicu oli manji ražanj, tako da ona dojde u oblik slova S, oli duplega slova S, oli slova S ipo, jebiga, zavisi kolika nan je anguja. Normalno, ne moran napominjat da ćemo spicu najprvo pinkicu popalit na ognju, da izgori bilo kakova šporkica, plisan oli kakove beštijice. Kako je anguja tvrda, nožon ćemo probit buže kroz koje ćemo provuć ujen pomazanu spicu. Oblit ćemo i anguju maslinovin ujen i tako nataknutu metnut na vrile gradele poviše žerave, sa drobon prama doli. Peć ćemo je tako dokle nan ne ćapa nu lipu boju pečanje, obrćuć je svaku toko sa jedne bande na drugu. Kvarat od ure bit će dosta.

Vraćenu s ognja nase na kakov pijat oli gvanćeru, oblit ćemo je maslinovin ujen i posut papron, ter ćemo je manjat sa kakovon kuhanon verduron, stavmo pritpostavka su na perunu blitve.