DALMATINSKA KUŽINA Barakokule lešo
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
brakokule, bilo vino
kapula, luk, petrusimul
papar u zrnu, sol, voda
maslinovo uje, javor
juha ol ribe
Barakokule su ne male ražice, ča hoće reć da se male ražice zovedu - barakokule. Prva lekcija!
Druga lekcija je da se barakokuliman ne rubi koža sa škine. Za razliku od raže. Eto, već smo puno naučili. Nećemo nin, barakokuliman, derat kožu sa škine - sa ne dvi lipe crne toškice na svakon strani krilih oli plećih - jerbo se ta koža more jist. Za razliku od raže. Vengo ćemo nin, barakokuliman, samo rasparat drob i bacit ća sve no iznutra. I, gotovo!
E sada, u široku teću ulit ćemo malo bilega vina, pa ćemo na to vino dodat usitno iskrižani luk, dva-tri lista javora i papra u zrnu, a ondac vaja metnut i kapulu izrizanu na kolobare. Pa složit na to barakokule. Pa sve to skupa zalit vodon oli juhon ol ribe: samo toko da se riba potopi i oplivi.
Raspališ ondac špaher, pa kal se on užešći, zaliješ su maslinovin ujen, poklopiš teću oli bronzin s pokrivon, i pustiš jošćec kigod minut dokle se barakokule ne skuhadu do kraja. A kada su se skuhale do kraja, barakokule, ondac ćemo jih posut s iskrižanin petrusimulon i moredu se omar jist.
