DALMATINSKA KUŽINA Bila buzara ol škanpih
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
škanpe, maslinovo uje
luk, petrusimul, sol, papar
bilo vino, juha ol kongih
Za napravit pravu delikatesu ol škanpih potriba je – ni po ure vrimena!
Prvo, na maslinoven uju šufigat ćemo punu šaku iskrižanega luka, pa kal je luk dobro zavonja po kužini prosut ćemo po njemu petrusimul, isto narizan usitno. Jesmo to obrnuli drvenjačon dva-tri puta, uvalit ćemo i škanpe, posolit jih pa daje šufigavat skupa s lukon i petrusimulon niko vrime, nakon čega ćemo u teću ulit žmul bilega vina i posut pinkicu su papron. To će tihulat tako pe-šest minutih, a ondac ćemo nastavjat dolivat juhu ol kongih jošćec kojih pe-šest minutih i – finito.
Ve škanpe moremo jist i vako, ćućajuć jih i trveć jih prstiman, a more se iskuhat i u šaki kakove pašte pa je polit so von buzaron.
