DALMATINSKA KUŽINA Bob i biž sa brbavican i srčanican
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
bob, biž, maslinovo uje
poriluk, kapulica, luk, petrusimul
kaduja, bilo vino, prošek, voda, sol
pasata ol pomidorih, peperončino
Kvartet delicij: boblje i bižje, brbavičad i srčaničad… Najprvo ćemo na maslinoven uju šufigat poriluk i mladu kapulicu, pa ćemo prama kraju dodat i usitno iskrižane luk i petrusimul. Pinkicu ćemo posolit (ali samo pinkicu, jerbo ćedu kašnje škojke pustit more).
Pa ondac vaja ubacit ozrnjeni biž i bob (veća zrna boba ćemo 'obrezati', naime, skinut ćemo nin – kožicu!). Tako ćemo jih šufigavat desetak minutih, pa ćemo ulit teple vode da sve oplivi, poklopit i molat da se kuha. Digod ćemo oklopit i sve drvenjačon izburtit. Pokle je pasalo jednu obilatih po ure, ulit ćemo pasate ol pomidorih, ter ćemo izmrvit kigod suhi peperončino i nikoliko listov suhe kaduje. Oblivat ćemo daje teplon vodon, dokle se ne smekša, a malo prin kraja iskrenut ćemo i dobro properene i od sarbuna ispurgane brbavice i srčanice, ter ćemo zalit to sve sa žmulon prošeka. Neka to još desetak minutih tihula, da se škojke otvoridu i pustidu more u šug. Kadikad vaja promišat, provat je vaja jošćec bokun posut soljon, a ondac ćemo so tin lipin šugon oblit kakovu manistru.
