DALMATINSKA KUŽINA Domaći kruh i pandeluša

Osnovni uvjeti:

brašno, kvas, voda
maslinovo uje, sol

Za ispeć dobar kruh vaja jemat osjećaj za tisto. Lako je na stol iskrenut brašno, učinit ga u jedan brig, pa na vrhu učinit jamku. E, ali vaja znat koko vode će brašno popit, koko vaja ulit uja, koko kvasa metnut, koko soli prosut meju prste…

Moja je nona u latenen potiću, u ki bi bila ulila teple vode (ne ni puno vrile, ma ne baš ni puno mlake), raskravila sol i kosku kvasa. Na kilo brašna išlo bi kolo dec vode, brž i pinku višje, a u nju bi se metnu jedan kućarin soli i na jobišna koskica kvasa. Maslinovega uja ulije se kolo deca, more i pinkicu boje, pa ako bude puno rilko dodat ćemo jošćec brašna, a ako bude puno gusto tisto poškropit ćemo ga su bokun teple vode. 

Da, kal smo dodali sve ča gre, ondac slidi važan operacijun: misenje tista na stolu. Ne vaja šparat ni na vrimenu, ni na mečenju dlanon i prstiman. I sadar vidin nonu kako non je gruda tista, svaki put kal bi dlanon uprla u nje i obrnula je za slideći put uprit dlanon, vavik na stolu izgledala isto! Kako god da je ismeči, svaki put je na kraju izgledala koda je ni ni takla. 

Pod rukan ćemo ćutit kal je tisto gotovo, kal vaja fermat sa misenjen. Pa ćemo ga položit u kakovu teću oli terinu da kisne (prin je za to služila drvena 'kopanja', na kojon je bi 'platul', drvena ploča na kojon se je tisto misilo i na kojen su se umisene turte kruha nosile do peći, u ku su se mećale drvenon 'palon'). Tisto se pokrije i ostavi, ako je moguće, digod uteplo, tako da ča boje uskisne. A kal uskisne, kal se udupla, ondac se tisto jopeta pripomisi i učinidu se grude tista za na komin. Neka lipo oldahnedu, pa kad se jopeta dignedu, ondac se svaku sebice položi na šamotne matune sa kojih smo olgrnuli žeravu i pomeli šuprašku. Tisto ćemo proć mokron rukon, da nan korica bude lišja kal se ispeče. 

Pokrit ćemo pekon, pa ćemo nju podušit sa žeravon, pazeć da oganj ne bude puno žeštok: da nan kora ne izgori izvanka, a pupa iznutra ne ostane sirova. Pokle je pasalo po ure, peku ćemo maknut, vidit ča je s kruhon, pa ćemo ondac, naprama potribi, jopeta vratit peku i zagrnut je žeravon: noliko jakon žeravon, koliko smo ocinili da je potriba.

Pandeluša

Pandeluša je štruca kruha ča se je pekla u krušnon peći sa šamotnin matuniman. Ko ni jema vaku pravu peć, moga je peć pandelušu u pećici ol špahera na drva. A vi se je kruh misi ol najbojega bilega brašna, najkvalitetnijega i najfinijega. Sa kapjon uja u sebi, kvason i pinku soli. I sadar vidin nonu kako misi tisto na stolu, kako čini turtu i meće je sa strane, uteplo, da se jošćec pinkicu diže prin vengo ča će je složit u pećicu ol špahera (ni non tribovala 'pala', s kojon su se turte stivavale u krušnu peć). Pinku je se pomaže vodon, složi u peć i izvadi pokle dobije nu lipu boju, teplu boju kruha.