DALMATINSKA KUŽINA Janjetina ispol peke

Osnovni uvjeti: 

janjetina, pančeta, kumpir

mrkva, kapula, luk, javor

slalka crvena paprika, sol

paprika, tikvica, balancana

ruzmarin, mravinac, kaduja

maslinovo uje, mast, bilo vino

Ka ča se parićaje teletina ispol peke, oli hubotnica pol pekon, slišno se tako parićaje i - janjetina ispol peke! Sve na istu bazu, a sve različito.

Napodan okrugle lašćere ulit ćemo maslinovega uja da prikrije lno, i dodat ćemo u to dvi dobre zlice masti ol bahića. Pa ćemo postivat janjetinu marason isičenu na olprilike jednake komade i dobro posoljenu, a i posutu su pinkicu slalke mlivene paprike. Pokle smo postivali meso, meju komade uvalit ćemo po dvi grančice ruzmarina i kaduje, tri-četiri lista javora i na zlici mlivenega mravinca.

Paprike vaja očistit, pa iskrižat svaku na četiri dila, oli šest, već naprama ten kolike su; balancane ćemo prvo ogulit, iskrižat na koske i posolit da se ispišadu; tikvice ćemo narizat na prst debele medaje, a mrkve pripolovit pa rasić po dužini. Kumpire ćemo pririzat na četiri dila, oli na šest: isti slučaj ka i s paprikan. Stavit ćemo i dva-tri češja luka, dvi kapule narizane na četiri dila (oli na šest: ka ča je situacija s paprikan i kumpiriman) i u šaki na prutiće iskrižane pančete. Sve ćemo to posolit i s tin svin zasut meso u lašćeri. Pa ćemo oblit s po bocuna bilega vina.

Poklopit ćemo lašćeru zagrijanon pekon ol giza, ka se je raškaldavala na ognju dokle su gorile bije oli tančik, ter ćemo je, poklopjenu, zasut su žeravon, a kraje vada zaspemo lugon da se peka ča boje poduši i da ča boje dihtuje. I neka tako tuntenja na kominu.

Pokle je prošlo kolo tri kvarta od ure, peku ćemo poldignut – pazeć da lug i šupraška š nje ne upadedu u spizu! - pa ćemo sve unutra dobro većon zlicon izburtit: dobro ćemo ispromišat. Vratit ćemo peku jopeta nase, zagrnut novon žeravon, zasut s lugon, i molat da se peče jošćec jednu tri kvarta od ure, oli pinkicu višje.