DALMATINSKA KUŽINA Knegle
Dalmatinska kužina Piše: Siniša Vuković

DALMATINSKA KUŽINA Knegle

'Maestrochef' Siniša Vuković piše o tradicionalnoj dalmatinskoj spizi

Osnovni uvjeti: 

tisto za njoke
slive, mermelada, kanela
maslinovo uje, prezla

Za napravit knegle vaja znat učinit tisto za njoke. Kratko i jasno! Njoke ol kumpirih, normalno. E, a to vaja pogledat na drugon stranici, neću se sal vode jopeta zafrkavat objašnjavajuć kako se misi tisto za njoke. Ol kumpirih.


I ondac, pokle se je tisto umisilo, okinut ćemo komadić rukon, lipo ga pinkicu umisit i meju prstiman ispripleskat, pa ćemo slivu zamotat u to tisto, pripleskano, tako da na bude iznutra, ko srce od umendule u kori, oli ko bobica u maslini… Knegla vada bude malo manja vengo ča je balunčić ol tenisa, tako da kal budedu gotove, da budedu – ko balunčić ol tenisa!

Zamotane slive u tisto, sirove knegle, postivat ćemo sa strane. 

Pa ćemo na maslinoven uju pinkicu šufigat prezlu. Ne puno, da ne izgori. Pa ondac u šufiganu prezlu vaja usut malo kanele, već naprama ten kako ko voli.

Navisili smo vodu, posolili smo tu vodu, pa kal uzavre u njon ćemo kuhat parićane i umisene knegle. U vrilu vodu stivajemo jednu po jednu kneglu, a kako se koja digne ko ča se digne… kako se koja digne ko ča se digne – sjeti san se: ko ča se digne njok! – ondac jih jošćec kigod minut obrćemo dokle se dobro ne iskuhadu, pa jih šupijačon, jednu po jednu, vadimo iz vode, dobro ocidimo i metnemo na pijat. Pokle smo sve knegle iz te ruke izvadili, ondac ćemo jih dobro izmejat u non prezli i kaneli.

Ako ni štajun ol sliv, zanamisto njih more se duperat na zlici mermelade…

Vaša reakcija na temu
Aloooo article_emotions(49962, "");
Pregledaj komentare