DALMATINSKA KUŽINA Kokoš su bižon

Osnovni uvjeti:

domaća kokoš
u terinici bižih, kapula
sol, papar, luk, petrusimul
slalka crvena paprika
pasata ol pomidora, brašno
maslinovo uje, voda, juha

Kokoš smo narizali prama pozicijan na komade (koristit ćemo batke, karabatke, pa i krila), nakon čega je vaja posolit. Neka posoljena stoji kigod minut, da meso dobro upije sol. Dokle meso upije sol, sol se topi a meso se obrosi, pa se reče da se to meso ispišalo; e, a ondac, meso vada se umeja u brašno i stavi ga se u teću na vrilo maslinovo uje da se friga. Ispržit triba meso sa svih stran, da se 'ubije krv', pa ga se izvadi iz teće nastranu.

Na to isto uje iskrene se usitno iskrižana kapula, pa se šufigaje dokle ne samre. Posoli se pinkicu kapulu, pazeć da se ne pritira, jerbo je meso već prin bilo posoljeno. Pri kraju, normalno, dodat ćemo dva-tri iskrižana češja luka, pinku pasate ol pomidorih i mlivene slalke paprike. Bokun ćemo to promišat, pa ćemo uvalit komade napolak isfriganega mesa ol kokoše, zalit s teplon vodon oli juhon i posut s papron. 

Pokle smo ocinili da je meso deboto gotovo, dodat ćemo u teću nastranu dobrin dilon u slanon vodi iskuhan biž. I neka se kuha daje dokle i meso i biž ne omekšadu skroz, i dokle se gušti ne izmišadu. Prin samega kraja usut ćemo unutra usitno iskrižanega petrusimula.