DALMATINSKA KUŽINA Komarča u foliji

Osnovni uvjeti:

komarča, luk, petrusimul

maslinovo uje, sol, papar u zrnu

Kal se reče folija, ondac je to na folija od aluminija, i nikakova druga. Ni na za pečenje, ni na za 'svježe' zamotavanje (pensan obo non od najilona, prozirnon). Folija je od aluminija i - gotovo!

Komarču najprvo vaja ostrgat od lustar, izvadit non branče i drob. Ako je riba veća, a za vu ricetu bi vajalo da je najmanje ol 45 dek, po kila, zarizat ćemo je sa strane na jedno oli na dva mista. Do po kila, 60 dek, zasić ćemo jedan put, a sve ča je većje su nožon ćemo potegnut dva puta. Pa ćemo ribu lipo posolit, izvanka i iznutra, a ondac ćemo u ne utore ča smo jih su nožon učinili, poslin soli, metnut usitno iskrižanega luka i petrusimula, ali i kugod balunicu papra u zrnu. Isto ćemo metnut i u ispražnjeni drob.

Ondac ćemo na foliju prolit maslinovega uja i prosut luka, petrusimula i papra, i lipo složit ribu na to. Oblit ćemo je jošćec bokun su kapjon uja, ulit ga i u drob, pa ribu i odizgari posut su lukon, petrusimulon i papron. Sadar ćemo komarču lipo zamotat u foliju, složit je u kakovu lašćeru i peć u špaheru na jednu 200 gradih temperamenta. Durada ol pečanje je: minut po svaken deku. Komarča ol 45 dek: tri kvarta od ure u špaheru.