DALMATINSKA KUŽINA Latežine na gradelan
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
prijatej bikar
latežine ol telića
maslinovo uje
sol, papar
Normalno, ko i za većinu ne spize ča je ne moreš nidi kupit, puno je važno jemat barenko jednega prijateja bikara, kako bi moga nabavit i ni komad mesa ča se ritko kad more nać u bikariji. Latežine ol telića jedna je ol tih stvarih… Latežine, ilitiga - carevo meso!
E, pokle nan je bikar na macelu da latežine ol telića, ondac ćemo nin pomnjivo oštrin nožon skinut kožicu. Pa ćemo jih prisić popoli, po dužini, i polit maslinovin ujen. Pa š njiman na gradele. To je brzo gotovo. Žerava vada bude ne previše žeštoka, ma ni previše slaba. I neka žlizde lipo ćapadu boju sa obe dvi bande.
Pokle su latežine pečene, skalat ćemo jih s gradel, posolit, i posut s mlivenin papron. A, normalno, nećemo jih zaboravit ni poškropit su kapjon maslinovega uja. I ondac ćemo ćutit ni lipi vonj kužinicih s kominon naših starih nonotih i nonih, kad su se pekli ni komadi mesa ča su drugi bacali; ča su nikada, tobože, bili siromaška spiza, a danas su delikatesa od kojih svak pade na guzicu kad mu jih lipo metneš u pijat na stol…
