DALMATINSKA KUŽINA Lešadura ol mola

Osnovni uvjeti:

mol ol parangala

u šaki škanpic

papar, sol, kapula

kumpir, mrkva, luk

kvasina, petrusimul

maslinovo uje, voda

Kal se spomene lešo riba, i juha ol ribe, ondac se obišno najpri misli na mola. Ne na dura, vengo na mola! I on se najčešće parićaje na lešo. Ondac, tote su jošćec tabinja i pavuk, pa ušata, ma i sva druga bila riba, jerbo se ol bile ribe čini juha i parićaje se na lešo. 

(Puno svita mi je reklo kako je juha ol šnjura ilitiga saruna jedna ol najlišjih ribjih juh! A to je plava riba. Pa ko voli, nek' izvoli!)

U teću ćemo metnut na kolobare iskrižanu kapulu, na po prsta debelo izrizane fete očišćenega kumpira i po dužini pripolovjenu mrkvu, pa ćemo dodat tri-četiri češja luka, dvi grančice petrusimula, nikoliko zrnih crnega papra i četiri-pet malih škanpic. Ondac ćemo ulit vode, ne puno, da oplivi povrće i da mol kal ga kasnije dodamo deboto viri iz juhe. Posolit ćemo i metnut na oganj.

Kad uzavre, malo ćemo smanjit temperamenat ognja, pa kal povrće bude na po puta kuhanje uvalit ćemo i očišćenega mola, oli višje njih, već naprama ten kolike su ribe. Skupa s ribon ulit ćemo i pinku maslinovega uja. Kuha se dokle mol ne bude mek. To će reć, ne puno.

Pokle je gotovo, mola ćemo izvadit na pijat, posut ga su bokun mlivenega papra i zagrnut povrćen s kojin se je kuha, a more se dolit i jošćec u čepu maslinovega uja. 

Stari su judi užali po lešo ribi polit na zlici kvasine.