DALMATINSKA KUŽINA Lešadura ol šanpjera

Osnovni uvjeti:
prijatej ribar
komad šanpjera
koren selena, sol, luk
list petrusimula, kapula
papar u zrnu, kumpir
maslinovo uje (rak)

Kal je posridi oborita riba, najboje je jemat kojegagod prijateja ribara. Situacija je slična ka sa lovciman: ako nemaš prijateja lovca, nećeš se lako okusit zeca oli jarebice, srnjaka oli fazana… To je zato ča te beštije nemaš di kupit, a s oboriton ribon situacija je taka ča je nemaš sa čin kupit… Pari poezija, ma ni. Skupo brate, skupo i priskupo…

E, dobro je, kal ti je obligani prijatej ribar doni na dar komad šanpjera, lipo ćeš mu izvadit branče i drob, pazeć da se ne ubodeš na ne drače kolo glave ča sličidu na udice, ma i na ne druge doli daje, prama repu, ča sličidu na zube ol morskega pasa ilitiga pešekanje. Ovode nema lustar, pa se nema ča čovik zajebavat oko strganja ribe nožon…

Pokle smo ribu očistili, očistit ćemo i kumpire, pa ostrgat mrkvu i koren selena izrizat na tanke fete. Na fete ćemo narizat i kumpire, a kapulu na kolobare. Luk ćemo prisić po dužini na dva-tri dila. E, ondac ćemo napodan teće ulit ne puno vode i metnut svo vo povrće unutra, ter ćemo na tu lipu postejicu poleć šanpjera. Dodat ćemo sol, kojegod zrno papra, dva-tri lista petrusimula i zalit ćemo su bokun maslinovega uja. Ako jemamo pri ruci kakovega raka, bilo bi ga dobro metnut unutra, da i on da svojega gušta.

Posli jednu kvarat od ure kuhanje, do dvadeset minutih, sve je gotovo. Na pijat ćemo pomnjivo izvadit šanpjera, pazeć da se ne raspade – jerbo je on, nako, miškinjast – i metnut ćemo kolo njega kuhani kumpir. Sve to skupa lipo triba posut sa sitno iskrižanin friškin petrusimulon i lukon, pa polit su jošćec suzon živega maslinovega uja i na zlici juhe u kon se to sve skupa kuhalo.