DALMATINSKA KUŽINA Medenjaci

Osnovni uvjeti:

30 dek meda, 25 dek cukra
25 dek masti, brašna koliko pita
3 jaja, kanela, šoda, sol
vanilin-šečer, prašak za pecivo

Najprvo vaja iskrenut med u kakovu pršuru, pa ga nalagahno poteplit, a ondac u njemu raskravit cukar i vanilin-šećer. Napose, raskravit ćemo i mast, pa to skupa izmišat. Pokle smo to dobro izburtili, metnut ćemo nastranu i molat da ostine. Vada dobro ostine.

Kal je sve ćapala studenica, ondac ćemo u to iskrenut jaja i kanelu, pa sve dobro drvenjačon izvrtejat. U jedan pijat usut ćemo kugod zlicu glalkega brašna, ken ćemo dodat, olprilike, dvi zlice oštrega brašna. Usut ćemo u to prašak za pecivo, na kućarinu šode i meju prstiman soli, ter ćemo sve dobro isprohmutat. Sve vo se sa pinku brašna vada izmiša prin vengo ča vaja dodat u nu smjesu sa medon, da prašak, šoda i sol ne bidu došli "na golo", vengo da se skupa sa brašnon umutidu u smjesu. Stalno vaja drvenjačon vrtejat.

Malo po malo, kako se brašno bude utapat u smjesu, sve ćemo ga lagahno dodavat višje i višje. Sve dokle se smjesa ne počme činit u tisto. Ruka će zabolit…! Ma, ne vaja klonut! Kal zagusti, iskrenut ćemo tisto na stol, pa ćemo tote nastavit daje misit stalno dodavajuć brašna koko bude tisto pitat. Pokle je tisto učinjeno, molat ćemo ga uru ipo vrimena da oldahne.

A kal je oldahlo, ondac ćemo rukan kidat komade od umisene grude, pa ćemo lipo vajat pod dlanoviman dokle ne dobijemo malu guju. Tu ćemo guju daje učinit u oblik slova U, ter ćemo jih ondac stivavat u lašćeru ku smo pinkicu pomazali mašćon. Ne smimo jih puno nabit, kako nan se medenjaci ne bidu zalipili jedan za drugega kal stanedu kisnut i bumbat dokle se budedu peć. A peć ćemo jih na jednu 200 stupnjev, kolo kvarat od ure, već naprama ten kako budedu minjat boju. Medenjake vada stalno jemamo na oku, da nan ne bidu izgorili. Izvadit ćemo jih kal dobijedu nu lipu kafenu boju, boju meda…