Dalmatinski portal koristi 'kolačiće' za što trebamo Vašu privolu. Ako nam želite pomoći u prikupljanju podataka za analitičke odnosno statističke svrhe, molimo Vas prihvaćanje 'kolačića' za analitiku. Naša web stranica koristi i marketinške 'kolačiće' zbog pružanja marketinškog sadržaja za koje od Vas također trebamo privolu. Bit ćemo sretni ako se slažete s tim jer Vam tako možemo ponuditi najbolje korisničko iskustvo.

Saznaj više
DALMATINSKA KUŽINA Nevica iliti paradižot
Dalmatinska kužina Piše: Siniša Vuković

DALMATINSKA KUŽINA Nevica iliti paradižot

'Maestrochef' Siniša Vuković piše o tradicionalnoj dalmatinskoj spizi

Osnovni uvjeti:

4 jaja, 70 dcl mlika, keksi
vanilin-šečer, cukar, ćikulata
kora od limuna i naranče, rum

Nevica ilitiga paradižot nika je vrsta vodnega sladoleda. Kal je se izvadi iz frižidera, to je prava delikatesa za rasfriškat se, a bome je i kripna, pa je dobra i za dicu. Spominjen se matere Nikoline u Supetru, kal bi kraj nje provodi lita (jerbo je ona živila u Supetru, a ja u Selciman), kako bi ona to lipo bila učinila, a ja bi gušta nevicu izvadit iz frižidera pa nako, iz terine, zlicon grabit koda nikad u životu ništa nisan pri bi izi…

Učinit nevicu ni nika filožofija, ma isto vaja jemat ruku i bit atento da sve ispade kako spada. Moća vidit kako to vaja parićat.


Najprvo ćemo razbit četiri jaja, pa ćemo žumanca metnut u jednu, a bilanca u drugu terinu. U treću terinu, u nu u ku ćemo kašnje izlit nevicu, na podanak ćemo ugrubo, meju prstiman, iskidat u šaki keksih 'petit-beurre' (oli ne druge, još običnije i jeftinije, sa srnon i jelenon). Pa ćemo ondac u tećicu na špaheru navisit obilatih po litra mlika, u ko ćemo iskrenut jednu kesicu vanilin-šečera i dvi vele zlice cukra, već naprama ten koliko slalka nevica želite da van bude. A mlika ćete ulit već naprama ten koliko rilka nevica želite da van bude.

Dokle mliko ne uzavre, u non jednon terini ćemo sa žicon istuć bilance, utvrdo, dokle pina ne postane taka da terinu š njon moreš okrenut naopako naviše glave, a da ne ispade iznutra. E, sad je mliko već uzavrilo, pa ga vaja smanjit napolak da ne iskipi. A i bilance se istuklo, pa ćemo ga grabit zlicon i mećat u to mliko uzavreno. Obrnut ćemo svaku grudicu dva tri puta, da jih vrilo mliko dobro osmudi, pa ćemo jih vadit i slagat na kekse razbivene u non 'trećon' terini. Činit ćemo to dokle jemamo bilanca.


Ondac na red dolazidu žumanca. Njih ćemo isto dobro sa žicon ispaštroćat, pa ćemo u njih usut izgratane kore ol naranče i limuna, naprama ten kako sami ocinimo. Sadar vada pomalo dolijemo vrilo mliko u va istučena žumanca, mišat ne pristajuć, i pazeć kakov je temperamenat mlika, da nan se žumanca ne bidu počela grušat, inkordavat, kal se dotaknedu sa vrilinon. Žumanca se tribadu dobro raskravit u mliku, davajuć mu nu lipu žućkastu boju. I u to ćemo ondac ulit po bićerina ruma, pa izmišat sve skupa u non teći di je uzavrilo mliko. 

Pokle smo to sve jošćec bokun izvrtili zlicon, ondac ćemo lipo počet ulivat, s jelnega kraja, u terinu u kon su keksi i obilanca sniga ol bilancih. Neka sve lipo dobro zapliva, a na samen kraju po snigu na vrhu nevice izgratat ćemo baštun oli dva ćikulate. I molat da se to lipo ohladi, nakon čega ćemo nevicu metnut u frižider da ostine, kako bismo je poslin mogli lipo sa žlicon jist, ko vodni sladoled.

Vaša reakcija na temu