DALMATINSKA KUŽINA Paprikaš od oreba

Osnovni uvjeti:

oreb, voda, kvasina, kapula
papar u zrnu, javor, sol, kaduja
maslinovo uje, crvena paprika, pasata
peperončino, suhe smokve, bilo vino, prošek
petrusimul, med ol kaduje, cukar

Pokle smo oreba lipo operušali močeć ga u vrilon vodi, dobro ćemo ga oprat i priko noći pustit da se kupa u marinadi ča se čini ol razvodnjene kvasine u kon pliva na polumisece iskrižana kapula, kogod zrno papra i dva-tri lista javora. Izjutra vaja oreba obrnut na drugu bandu, da se pjutošto namoči i odizdali.

Prid obid, oli večeru, ticu ćemo izvadit iz marinade i rasić na nikoliko komadih, prama pozicijan mesa. Pa ćemo na maslinoven uju zažutit kapulu ča je noćila u bevandi kvasine sa orebon. Prama kraju šufigavanja posolit ćemo kapulu i iskrenut iskrižani petrusimul, zajedno sa komadiman mesa. Obrnut ćemo to tri-četiri puta, pa ćemo teću poklopit i molat da tako tihula desetak minutih. Čin je izvitrila voda ča je je pustilo meso, teću ćemo oblit bilin vinon, promišat, pa dodat na komadiće iskrižanu crvenu papriku i tri-četiri narizane suhe smokve, peperončino, kigod list suhe kaduje i javora, na kućarinu cukra, ter po žmula pasate ol pomidorih. Dolit ćemo juhe ol pivca i vina, da meso posve oplivi, a kako bude vampit, pomalo ćemo šug jošćec oblivat juhon i vinon. Na samen kraju dolit ćemo u bićerinu prošeka i na zlici meda ol kaduje. Pustit vaja to sada da učini dva glogoja i – finito!